Засгийн газрын хэрэгжүүлэгч агентлаг Соёл, урлагийн газар “Бүс ба зам” хөтөлбөрийн хүрээнд БНХАУ-ын Үйлдвэр, мэдээллийн яамны дэргэдэх Соёл урлагийн төв болон И Ли мужийн Өв соёлын газар, ОХУ-ын Буриад Улсын Үндэсний музей, Монгол Улсын Уран зургийн галерейтэй хамтран “Торгоны зам –вааран урлал” олон улсын үзэсгэлэнг зохион байгуулж буй билээ. “Уран зургийн галерей”-д энэ сарын 15-нд нээлтээ хийсэн тус үзэсгэлэн 7 хоногийн турш олон нийтийн мэлмийг баясгана. Үзэсгэлэнгийн бүтээлүүдийг БНХАУ-ын  шаазан урлалын төв болох Жиндэмин хотод Монголын талаас МУУГЗ, Төрийн шагналт, зураач Ш.Чимэддорж, уран бичлэгийн мастер, зураач П.Тамир, Буриадын талаас тус улсын нэрт уран бүтээлчид Александра Дугарова, Чингис Базаров нар Хятадын уран бүтээлчидтэй хамтран бүтээсэн байна. Тэд бүтээлүүдээ энэ оны 3 дугаар сарын 27-ноос 14 хоногийн хугацаатай  хийж гүйцэтгэсэн аж. Уран зургийг шаазан урлалтай хослуулан бүтээсэн давтагдашгүй бүтээлүүдээс нь зураач бүрийн дотоод мэдрэмж, өнгө аяс харагдана. Энэхүү үзэсгэлэн нь ирэх аравдугаар сарын  эхний долоо хоногт Буриад Улсын Үндэсний музейд гарах юм байна.