Буянтай буурлуудынхаа үлдээсэн буурал театрынхаа 87 насны ойн баярыг УДЭТ-ын хамт олон “Оддын өвчин” инээдмийн жүжгээр тэмдэглэх гэж байна. Тодруулбал, 2018-2019 оны үзвэрийн жилийн нээлтээ энэ сарын 15-нд Америкийн алдарт зохиолч К.Людвигийн "ОДДЫН ӨВЧИН" инээдмийн жүжгээр нээж, театрын урлагийг шимтэн сонирхож, хайрлан биширдэг үзэгчдэдээ хайр, ухаарал, инээд баясал бэлэглэхэд бэлэн болжээ. Зохиож, найруулсан жүжгүүд нь Бродвейн театрын тайзнаа эзэгнэж, холливудын дэлгэцийг дүүргэж байдаг К.Людвиг хэмээх энэ эрхмийн дараачийн жүжиг Д.Нацагдоржийн нэрэмжит УДЭТ-ын тайзнаа тавигдаж үзэгчдийн сэтгэлийг булиглуулж инээд баяслыг хүртээх нь гарцаагүй. Энэхүү уран бүтээлийн ерөнхий найруулагчаар СТА Ч.Түвшин, орчуулагчаар УДЭТ-ын Уран сайхны удирдагч, Урлагийн гавьяат зүтгэлтэн Н.Ганхуяг, зураачаар СТА С.Ариунболд, хөгжмийн зохиолчоор Урлагийн гавьяат зүтгэлтэн Г.Энхбаяр нар ажилласан байна.
