БНСУ-ын Намянжү хот, Монгол Улсын нийслэл Улаанбаатар хот хоорондын найрамдалт харилцаа тогтоосны 20 жилийн ой өнгөрсөн жил тохиосон. Хоёр хот соёл урлаг болон бусад салбарт ч гэлээ 20 гаруй жилийн турш хамтын ажиллагаатай явж ирсэн түүхтэй. Намянжү хотод манай улсын соёл урлагийг сурталчилсан соёлын хотхон бий.
Тус хотхон нь Чингис хаанаас эхлээд Монголын хаад, үндэстэн угсаатны зан заншил, түүхийг харуулсан үзэсгэлэнгийн танхимтайгаас гадна монгол ардын дуу, бүжиг, хөгжим зэргийг үзүүлдэг язгуур урлагийн тоглолтыг жил бүр найман сарын хугацаанд тогтмол явуулдаг байгаа. Мөн жил бүр Монголоос уран бүтээлчид очиж, урлагийн тоглолт хийдэг уламжлал тогтоод багагүй хугацаа өнгөрсөн. Гэвч энэхүү хотхоныг хаах шийдвэрийг өчигдөр Намянжү хотын захиргаанаас гаргасан байна. Солонгост Монголынхоо түүх соёлыг сурталчлан таниулдаг байсан ганц газар хаагдах болсон харамсалтай мэдээ тус улсын цахим хуудаснаа нийтлэгджээ.