Монгол төрийн үндэсний хөгжмийн их найрал үүсэн байгуулагдсаны 50 жилийн ой энэ онд тохиож байна. Ойн хүрээнд Үндэсний дуу бүжгийн эрдмийн чуулгынхан рок, попын дуучидтай хамтран нэгэн сонирхолтой тоглолт хийхээр болжээ. “Рок попын оддын их хуралдай” тоглолт энэ сарын 25-нд болно. Уг тоглолтод “Харанга” хамтлагийн дуучин Х.Лхагвасүрэн, “Чингис хаан” хамтлагийн ахлагч, Гавьяат жүжигчин Д.Жаргалсайхан, Б.Сарантуяа, Т.Ариунаа, Ж.Алтанцэцэг, Төрийн соёрхолт дуучин Д.Болд, “Никитон” хамтлагийн ахлагч Ц.Батчулуун, “Номин талст” хамтлагийн дуучин Т.Дэлгэрмөрөн, “Хар сарнай” хамтлагийн ахлагч С.Амармандах, төгөлдөр хуурч Б.Чинбат, хийлч Ч.Дэлгэрцэцэг нар оролцож ая дуугаа өргөнө. Соёлын төв өргөөнд ганцхан удаа эгшиглэх уг тоглолтын хөгжмийг Монгол төрийн их найрал тоглох ажээ.