Монгол Улсын Ерөнхий сайд Ухнаагийн Хүрэлсүхийн санаачилгаар БСШУСЯ, Нийслэлийн Засаг даргын тамгын газар, ЗГ-ын хэрэгжүүлэгч агентлаг Соёл урлагийн газар, Нийслэлийн соёл урлагийн газар хамтран соёл урлагийн байгууллагуудын “Нээлттэй хаалганы өдөрлөг”-ийг Сүхбаатарын талбайд зохион байгууллаа.
Боловсрол, соёл, шинжлэх ухаан, спортын сайд Ё.Баатарбилэг арга хэмжээг нээж хэлсэн үгэндээ, Олон нийтийг соён гэгээрүүлэх, урлаг соёлоор дамжуулан эерэг хандлагатай болгох нь нэн чухал асуудал юм. Тиймээс МУ-ын Ерөнхий сайдын санаачилгаар улс орон даяар соён гэгээрүүлэх аяныг зохион байгуулахаар төлөвлөсөн. Өнөөдрийн “Нээлттэй хаалганы өдөрлөг” нь соён гэгээрүүлэх аяны эхлэл юм гээд өдөрлөгийн арга хэмжээнд амжилт хүслээ.
Соёл урлагийн байгууллагууд үйл ажиллагаагаа үзэсгэлэн хэлбэрээр сурталчлан танилцуулахаас гадна театр, чуулга, музей, номын сан, их сургуулиуд урлагийн тоглолт болон бусад сонирхолтой арга хэмжээг зохион байгуулах юм.
Тухайлбал, иргэд олон нийтэд зориулан тоглолт, үзвэр, музей үзэх эрх олгох, азтан шалгаруулах, номын сангууд уншигчдын үнэмлэх нээх зэрэг төрөл бүрийн урамшуулалт арга хэмжээ явагдах юм байна.
