Монголын хүүхэлдэйн киноны урлагт өнөөг хүртэл үнэ цэнэтэй хэвээр "Эрх цагаан ишиг", "Шаазан заан", "Өвгөн арслан хоёр" зэрэг 20-иод хүүхэлдэйн киног хамтран бүтээсэн зураач, найруулагч Үржингийн Болдсайханыг Монгол Улсын Соёлын тэргүүний ажилтан цол тэмдгээр шагнасныг БСШУСЯ-ны Төрийн нарийн бичгийн дарга Б.Баярсайхан гардуулан өглөө.
Зураач, найруулагч Ү.Болдсайхан хуучнаар Улсын багшийн дээд сургууль, Ленинград хотын Театр, кино, хөгжмийн дээд сургуулийг төгссөн бөгөөд 1984 оноос хойш Мэдээлэл, радио телевизийн улсын хорооны дэргэдэх Телекино үйлдвэрийн хүүхэлдэйн цех, “Улаан од” сонинд мэргэжлээрээ ажиллаж, хүүхэд залуучуудад зориулсан олон бүтээлд оролцож байжээ.
Түүний бүтээсэн "Хүн ба морь", "Хүн ба байгаль" гэдэг график зураг нь Монголын Үндэсний Галерейн үнэт бүтээлийн фондод хадгалагдахын зэрэгцээ Монголд үйлдвэрлэсэн шилдэг бүтээгдэхүүний гранпри, Тэргүүний тариаланч хамт олон шагнал болон МХАҮТ зэрэг төрийн бус байгууллагуудын нэр хүндтэй шагналуудын цомыг урласан нь өнөөг хүртэл хэрэглэгдэж байна.
