Алдарт "Жаран хар, арван цагаан"-ны үргэлжлэл Цэргийн дуу бүжгийн Эрдмийн чуулгын найрал дуучид маань Монгол улсынхаа "Тусгаар тогтнол"-ыг тунхаглан дуулж, эх оронч үзлийг түгээн дэлгэрүүлэх нэгэн сайхан үйлийн хүндэт оролцогчид боллоо.
Монгол Улсын Хөдөлмөрийн баатар, Ардын уран зохиолч Д.Пүрэвдоржийн "Тусгаар тогтнол" хэмээх алдартай шүлэгт Монгол Улсын Урлагийн Гавьяат Зүтгэлтэн, "Никитон" хамтлагийн ахлагч дуучин Б.Батчулуун аялгуу хийж, Чингис хаан одонт, Монгол Улсын гавьяат жүжигчин, дуучин Г.Ариунбаатар болон ЦДБЭЧ-ын найрал дуучидтай хамтран дуулж, Ардын хувьсгалын түүхт 100 жилийн ойдоо бэлэг барилаа.
ЦДБЭЧ-ын ерөнхий хормейстр, дэд хурандаа А.Ариунзаяа "Цэргийн уран бүтээлчид бид эх орон, эр цэрэг, Зэвсэгт хүчнээ магтан дуулахын зэрэгцээ энэ цагийн бидний эрх чөлөө, тусгаар тогтнол ямар үнэ цэнээр олдсоныг энэхүү шинэ уран бүтээлээрээ тунхаглаж байнаа" гээд, нийт уран бүтээлчиддээ амжилт хүслээ.
