“БИОЛОГИЙН ОЛОН ЯНЗ БАЙДЛЫГ ХАМГААЛАХ, УУР АМЬСГАЛЫН ӨӨРЧЛӨЛТӨД ДАСАН ЗОХИЦОХ ТӨСӨЛ” нь 2015 оноос хойш манай улсад хэрэгжиж буй юм. Тус төсөл нь 2027 он хүртэл үргэлжлэнэ. Өнөөдөр эл төслийн хүрээнд буюу тусгай хамгаалалттай газар нутгийн захиргаадын үйл ажиллагааг тогтвортой, тасралтгүй явуулахад дэмжлэг үзүүлэн 7 фургон автомашин болон төслийн хүрээнд баригдсан 55 барилгад 22 нэр төрлийн 575 техник, тоног төхөөрөмж зэргийг гардуулан өглөө.
Энэхүү арга хэмжээд БОАЖ-ын сайд Б.Бат-Эрдэнэ, ТНБД Э. Баттулга болон БОАЖЯ-ны албаны бусад төлөөлөл, мөн ХБНГУ-аас Монгол Улсад суух Онц бөгөөд Бүрэн эрхт Элчин сайд Й. Розенберг, Германы Сэргээн босголт, зээлийн KfW банкны Монгол дахь салбарын захирал М.Зумзер нар оролцлоо.
Мөн эл арга хэмжээг нээж, БОАЖ-ын сайд Б.Бат-Эрдэнэ үг хэлэв. Тэрбээр “Буцалтгүй тусламжийн хэлэлцээрийн хүрээнд төслийн санхүүжилтийг олгож буй Холбооны Бүгд Найрамдах Герман Улсын Засгийн Газар болон Германы сэргээн босголтын зээлийн банканд БОАЖ-ын сайд талархал илэрхийлье” гэв.
Мөн хэрэгжүүлэгч тал болох Байгаль орчин, аялал жуулчлалын яам, Улсын тусгай хамгаалалттай газрын хамгалалтын захиргаанд төслөө амжилттай хэрэгжүүлэн Монгол Улсын Тусгай хамгаалалттай газар нутгийн менежментийн үр ашигтай байдлыг нэмэгдүүлэн цогц байдлаар хөгжүүлж, биологийн олон янз байдлыг хамгаалж, орчны бүс дэх орон нутгийн ард иргэдийн тогтвортой амьжиргааг дэмжих үйл хэрэгт амжилт хүсэв.
