“Йогийн хаан” хочтой хоригдол Өмнөд Солонгосын шоронгоос хоол өгөх, ажиглах зориулалттай  15 х 45 см-ийн цонхоор гарч оргосон байна. Өдгөө 50 настай йогч Каб Чой Боку уг нь 165 см өндөр, 50 кг жинтэй юм байна. Шоронгийн хонгилд дох видео камерыг үзсэн мөрдөн байцаагч нь “Тэр яг л наймаалж шиг уян зөөлөн хөдөлж байсан” гэжээ. Тэр шөнө жижүүрлэж байсан гурван цагдаа энэ үеэр унтаж байсан  гэж The Korea Times мэдээлсэн байна.
Оргодлыг зургаа хоног эрсний эцэст өөрийн байшингийнхаа дээвэрт цаасан хайрцганд нуугдсан байхыг нь олсон байна.  Түүнийг шоронд авчраад камерынх нь хаалган дах хоол оруулдаг цонхыг багасгажээ.
Каб Чой Боку өөрийг нь хулгайд хардаж баривчилсан нь хилс гэдгийг ойлгуулах гэж оргосон гэж мэдүүлсэн байна.  Харамсалтай нь “Йогийн хаан” шоронгоос оргосныхоо дараа зээлийн карт, машин хулгайлжээ.
Тэрээр амьдралынхаа 23 жилийг шоронд өнгөрүүлж байгаа юм байна. 22 жилийн өмнө тэр бас шоронгийн автобусны цонхны торон хаалт дундуур гарч оргож байжээ.