Сирийн босогчдын “Сирийн чөлөөт арми”-ийн хэдэн офицер эрх баригчдын эсрэг тэмцэхээс татгалзаж байгаагаа илэрхийллээ гэж РИА Новости агентлаг дамжууллаа. “Бид сиричүүд сирийн иргэдийн эсрэг зэвсэг барин тэмцэхээс татгалзаж байна. Энэ нь улс оронд хямрал авчирч байгаа юм” гэж тэдний нэг, өмнөд Сири дэх чөлөөт армийн цэргийн зөвлөлийн дарга,  хурандаа Халед аз-Залем бусдынхаа өмнөөс мэдэгдсэн байна. Өмнө нь ч Сирийн чөлөөт армийн зарим дайчин алдаа хийж байгаагаа мэдэгдэж байсан юм. Тэд Сирийн засгийн газрын армийн удирдлагын мэдэлд очиж байгаагаа мэдэгдэж бусдыгаа энэ жишээг дагахыг уриалжээ.
Сирид Ерөнхийлөгч Башар Асадыг эсэргүүцсэн хөдөлгөөн өрнөж улмаар иргэний дайны хэмжээнд хүрснээс өнгөрсөн жил хагасын хугацаанд 20 орчим мянган хүн амь үрэгдээд байгаа юм.