УИХ-ын шинэчилсэн цахим хуудсын нээлт өчигдөр боллоо. Цахим хуудсын нээлтэд УИХ-ын дарга З.Энхболд болон УИХ-ын Мэдээллийн технологи, техник ашиглалтын хэлтсийнхэн оролцсон юм. УИХ-ын дарга З.Энхболд цахим хуудсын нээлтийн үеэр “УИХ төрийн байгууллагуудаас хамгийн нээлттэй байгууллага болж ажиллана” гэдгийг онцолж байлаа.
УИХ-ын 1996 оноос эхлэн  өөрийн гэсэн цахим хуудас ажиллуулж эхэлжээ. Олон улсын парламентын холбоонд бүртгэлтэй parliament.mn домайн хаягийг ашигладаг. Энэ цахим хуудсыг УИХ-ын бүрэн эрхийн хугацаатай холбоотойгоор шинэчлэн сайжруулж ирсэн аж. Өчигдөр нээлтээ хийсэн цахим хуудас нь шинэчлэгдсэн тав дахь хувилбар юм байна. Энэ удаад дээрх цахис хуудастай хамт УИХ-ын Тамгын газрын цахим оффисийн системийг программчлалын хувьд бүрэн шинэчилснээс гадна УИХ-ын гишүүд, Байнгын хороод, Тамгын газрын хэлтэс, албад тус бүрдээ дэд цахим хуудастай болох боломж бүрдүүлжээ. Цахим хуудсаар санал асуулга явуулж, хэлэлцүүлэг өрнүүлэх, “фэйсбүүк”, “твиттер”-тэй холбосон учир хууль тогтоох үйл ажиллагааны тухай мэдээ мэдээллийг олон нийтэд шуурхай түгээх боломжтой аж.