Дуучин Кэти Перри ирэх сард болох Ерөнхийлөгчийн сонгуульд нэр дэвшиж буй Барак Обамаг дэмжин, түүний сонгуулийн кампанид хандив босгох концертод оролцжээ. Дуучин Женнифер Хадсон, Стиви Уондер, Жон Бон Жови Жорж Клуни зэрэг уран бүтээлчдийн хамт Ерөнхийлөгчөө дэмжих концертод оролцохдоо Кэти Перри хумсаа Б.Обамагийн зураг болон Ардчилсан намын туг далбааны өнгө бүхий будгаар гоёжээ.
Ер нь, сүүлийн үед барууны оддын дунд хэн нэгний зургаар хумсаа гоёж, маникур хийлгэх нь моод болоод байгаа. Тухайлбал, дуучин Бионсе нөхөр Жэй Зигийнхээ зургийг хумсан дээрээ урлуулж, алтан шаргал өнгөөр будаж байсан бол дуучин Рианна паралимпын хаалтын ёслолд оролцохдоо Их Британийн хатан хаан II Элизаветагийн хөргөөр хумсаа гоёж байсан билээ.  
Харин Б.Обамад хандив цуглуулах тоглолтын тухайд тасалбар нь 250 ам.долларын үнэтэй уг концертыг 6000 хүн үзжээ.