“Facebook”-ийн хэрэглэгчдийн хамгийн дуртай үйлдэл болох “like”-ийг бодитоор мэдрүүлэх хүрмийг АНУ-ын нэгэн дизайнер зохион бүтээжээ. Тусгай мэдрэгч бүхий уг хүрмийг өмсч байгаа үед Facebook хуудсанд тань хэн нэгэн Like дарвал хүрэм доторх агаар халж тэлэн яг л тэвэрч байгаа мэт мэдрэмж төрүүлэх юм байна. “Like-A-Hug” буюу “Яг л тэврэлт шиг” хэмээх энэ мэдрэгчтэй хүрмийг Массачуссетсын Технологийн их сургуулийн оюутан Мелисса Чоу зохион бүтээжээ.
Өнөө үеийн залуусын харилцааны чухал хэрэгслийн нэг болсон Facebook-ийн “Like” товчинд бүх хүн дуртай ч түүнийг дарсан хүнийхээ таатай сэтгэгдлийг бодитоор мэдэрч чаддаггүй. Тэгвэл энэ хүрэм яг тэр халуун дулаан харилцаа,  хайр, нөхөрлөл, талархал, дэмжлэг гээд сайхан бүхнийг халуун тэврэлтээр мэдрүүлэх юм гэж зохион бүтээгч нь ярьжээ. Дашрамд сонирхуулахад, “Facebook” нийтийн хүртээл болсноос хойш уг сайтын хэрэглэгчид 1.13 триллион “like” дарж, 140,3 тэрбум холболтоор хүмүүс хоорондоо найз болж, 219 тэрбум зураг шэйрлэж, өдөр тутам 300 сая зураг татаж байгаа гэсэн тоо бий.