Завхан аймаг 2025 оны улсын төсөвт барилга байгууламжаас илүү дэд бүтэц, зам гүүр, цэвэр, бохир усны шугам сүлжээ, холбоо харилцаа, цахилгаан хангамжийг нэмсэн төсвүүдийг тавиулахаар төсөлд тусгуулжээ.
2025 оны улсын төсөвт “Нөмрөг-Улаангом чиглэлийн А18 дугаартай авто замаас Арцсуурь хилийн боомт хүртэлх хатуу хучилттай 159.5 км авто замыг 99.4 тэрбум төгрөгөөр барих” төслийг өргөн барьсан. Энэ замыг барьснаар Завхан аймаг ОХУ-тай шууд авто замаар холбогдоно.
Монгол Улсын урт хугацааны хөгжлийн бодлого Алсын хараа-2050 зорилтод Нутгийн зам хөтөлбөрийг тусгасан. Зам, тээврийн хөгжлийн яам нь 2024 онд авто замын салбар нийт 5045 км авто зам, 3056 урт метр гүүрийг барьж, долоон аймаг, 40 сум, хоёр хилийн боомтын хатуу хучилттай авто замаар холбох ажлыг үргэлжлүүлэн болон шинээр эхлүүлэхээр ажиллаж байна. Дөрөвдүгээр сард Ховд-Улиастайг холбох хатуу хучилттай замын нэг хэсэг болох Дөргөн сумыг холбох 41 км автозамын барилгын ажил эхэлсэн. Ингэснээр Ховд аймгийн Дөргөн сумаас Завханы Улиастай чиглэлд Мянганы зам анх төлөвлөсөн ёсоор хэрэгжих боломж бүрдэж байна. Улиастай-Алтай чиглэлийн 198 км замын ажил төслийн шатандаа явж байна.
Мөн Завхан аймгийн дулааны станц ирэх жил ашиглалтад орохтой холбогдуулан дулааны шугам сүлжээг барьж байгуулах 19.7 тэрбум төгрөгийг 2025 оны төсөвт суулгуулахаар болсон.
Энэ төсөв батлагдаж дулааны станц ашиглалтад орсноор Улиастай хотын айл, албан байгууллага дулаантай шууд холбогдон барилгажих үйл явц эрчимжинэ.
Солонготын давааны шороон хэсгийг намсган 46.2 тэрбум төгрөгөөр хучих төсвийг 2025 оны төсвийн төсөлд өргөн барьсан. Завхан аймгийг олон жилийн турш “дэд бүтцийн өрсөлдөх чадвар муу”, “бизнесийн үр ашиг муу” гэсэн үзүүлэлтээр бүх аймгийн сүүлд бичигддэг байсанд дүгнэлт хийж, ирэх оны төсвийн төсөлд бодлоготой уялдуулан төслүүдээ өргөн барьсан. Ирэх жил тус аймаг дэд бүтцийн өрсөлдөх чадварын хувьд ахиц дэвшил гаргана хэмээн Завхан аймгийн ЗДТГ-аас мэдээлэв.
