АНУ-ын Ерөнхийлөгчийн сонгуульд нэр дэвшигчдийн хоёр дахь халз мэтгэлцээн хэдхэн минутын өмнө өндөрлөлөө. Энэ удаагийн мэтгэлцээнд хоёр нэр дэвшигч хэр сайн байх нь сонгогчдын хувьд хамгийн их сонирхож байсан зүйл мөн боловч тэдний эхнэрүүд түүнээс дутахгүй олны анхаарлыг татаж байв.
Учир нь, халз мэтгэлцээнд нөхрөө дэмжихээр ирсэн нэр дэвшигчдийн эхнэр хоёулаа ягаан өнгийн хувцсаар гоёсон байлаа. Тэргүүн хатагтай Мишель Обама ягаан өнгийн даашинз, хүрэм, сувдан зүүлтээр гоёсон бол Митт Ромнигийн эхнэр Энн Ромни мөн л ханцуйгүй ягаан даашинз, шилэн зүүлт сонгожээ.
Цагаан ордны ирээдүйн эзэгтэй хэн болох нь хэдхэн хоногийн дараа шийдэгдэх энэ хоёр хатагтай ягаан өнгийг сонгосон нь учиртай. Хөхний хорт хавдрын аюулаас урьдчилан сэргийлэх сарын аян АНУ-д одоо өрнөж буй бөгөөд энэ аяны бэлгэдэл өнгө нь ягаан эхнэрүүд нь тэдэнд дэм болж, сонгогчдын таашаал хүртэх гэж бас л хичээж байгаа нь Ерөнхийлөгчийн сонгууль хэр өрсөлдөөнтэй болж буйг харуулж байгаа юм.