Улаанбаатарын нийтийн эзэмшлийн талбай, явган хүний зам дээр байршуулсан гэрэлтүүлгийн шонг шилжүүлж, зорчих хэсгийг чөлөөлөх ажлыг өнгөрсөн оноос эхлүүлсэн.
Өнөөдрийн байдлаар 1000 шонг шилжүүлжээ. Зам талбайн нөхөн сэргээлтийн ажлыг өнөөдрөөс эхлүүллээ. Энэ онд гэрэлтүүлгийн 650 шонг шилжүүлнэ.
Энэ талаар УБЗАА-ны Хотын инженерийн дэд бүтцийн газрын дарга Л.Алтангэрэл “Төвийн зургаан дүүрэгт гэрэлтүүлгийн ашиглалт, засвар үйлчилгээ эрхэлдэг нийт 18 аж ахуйн нэгж байгууллага байдаг.
Эдгээр байгууллагын 2025 онд хийсэн судалгаагаар нийслэлд явган хүний зам, нийтийн эзэмшлийн зам талбай дээр гэрэлтүүлгийн 1650 шон байршуулсныг тогтоосон. Өнгөрсөн оны арваннэгдүгээр сараас уг гэрэлтүүлгийн шонгуудыг чөлөөлж эхэлсэн юм.
Ингэхдээ түр хугацаанд тухайн орчмын зам, талбайг хучиж орхижээ. Урин дулаан эхэлсэнтэй холбоотойгоор өнөөдрөөс нөхөн сэргээлтийн ажлыг эхлүүлж байна. Ингэснээр иргэд явган хүний замаар аюулгүй, чөлөөтэй зорчих боломж бүрдэнэ” гэв.
“Төгс гэрэлтүүлэг” ХХК-ийн цахилгааны техникч А.Амартүвшин “Манай байгууллагын хувьд Баянгол дүүргийн хэмжээнд гэр хороолол, төв зам дагуух явган хүний зам, нийтийн эзэмшлийн талбайгаас гэрэлтүүлгийн 227 шонг шилжүүлж, зорчих хэсгийг чөлөөлсөн” гэлээ.
