АНУ-ын Ерөнхийлөгч Б.Обама өчигдөр сонгуульд саналаа өгөхөөр Чикаго хотын санал хураах байранд ирэхдээ тэнд ажиллаж байсан хүмүүсийг багагүй хөгжөөгөөд авчээ. Саяхан жолооны үнэмлэхээ сунгуулсандаа сэтгэл хангалуун байгаагаа хэлсэн Ерөнхийлөгч түүний бичиг баримтыг шалгасан ажилтанд “Энэ зурганд цагаан үс байхгүй байгаа. Битгий тоогоорой” хэмээн хошигножээ.
Б.Обама ирэх сарын 6-нд болох Ерөнхийлөгчийн сонгуулиас урьтаж саналаа өгснөөрөө америкчуудыг саналаа урьдчилан өгөхөд уриалан дуудаж байгаа юм. Тэрээр ярихдаа “Сонгуулийн өдөр юу ч тохиолдож болно шүү дээ. Хэрвээ танд сонгуулиас өмнө зав чөлөө гарвал ингээд саналаа өгчихөж болно гэдгийг би харуулахыг хүссэн юм” гэжээ. Тэрээр хэний төлөө саналаа өгснөө нууцалсан ч мэдээж ямар сонголт хийсэн нь бүхэнд тодорхой билээ.