Улаанбаатар хотын Захирагчийн ажлын алба-наас Үндэсний мод тарих өдрийн хүрээнд нийслэлийн хэмжээнд ногоон байгууламжийг нэмэгдүүлэх, хотын өнгө үзэмжийг сайжруулах, иргэдийн эрүүл аюулгүй орчинд амьдрах нөхцөлийг бүрдүүлэх зорилтын хүрээнд төлөвлөгөөт ажлуудыг үе шаттай хэрэгжүүлж байна.
Тухайлбал, Төв цэнгэлдэх хүрээлэн болон орчмын бүсэд нийт 7000 ширхэг мод, сөөг тарьж, хотын цэцэрлэгт хүрээлэнгийн ногоон байгууламжийг нэмэгдүүлэх ажлыг зохион байгууллаа.
Энэ хүрээнд далан хальс, долоогоно, голт бор, шар хайлаас, монос зэрэг Улаанбаатар хотын хөрс, цаг уурын нөхцөлд дасан зохицох чадвартай мод, сөөгийг сонгон тариалсан бөгөөд цаашид арчилгаа, усалгаа, хамгаалалтын ажлыг тогтмол хэрэгжүүлэхээр төлөвлөж байна.
Ногоон байгууламжийг нэмэгдүүлэх энэхүү ажил нь хотын экологийн тэнцвэрт байдлыг хадгалах, агаарыг цэвэршүүлэх, тоосжилт бууруулах, иргэдийн амарч зугаалах таатай орчныг бүрдүүлэхэд чухал ач холбогдолтой юм.
Мөн нийслэлийн хэмжээнд хэрэгжүүлж буй тохижилт, бүтээн байгуулалтын ажлын хүрээнд цэцэрлэгт хүрээлэн, нийтийн эзэмшлийн талбай, авто замын дагуух ногоон байгууламжийг нэмэгдүүлэх ажлыг үе шаттай үргэлжлүүлэн хэрэгжүүлэхээр ажиллаж байна.
