Онцгой байдлын ерөнхий газраас зөөврийн барокамерын ашиглалт, хадгалалт, засвар үйлчилгээний сургалт, дадлагыг Хөвсгөл аймагт зохион байгуулж байна.
Сургалт, дадлага энэ сарын 17-22-ны өдрүүдэд Хөвсгөл аймгийн Онцгой байдлын газрын Гал түймэр унтраах, аврах 69 дүгээр ангийн байрлалд үргэлжилж байна. Сургалтад ОБЕГ, Үндэсний аврах бригад, 09 дүгээр анги болон Хөвсгөл аймгийн Онцгой байдлын газрын холбогдох алба хаагчид хамрагдаж байна.
Зөөврийн барокамер нь шумбалтын үед даралтын огцом өөрчлөлтөөс үүсэх эрсдэлийг бууруулах, шумбалтын явцад болон дараа үүссэн даралт бууралтын өвчин, хийн эмболийн үед эмчилгээ хийхэд чухал ач холбогдолтой тоног төхөөрөмж юм.
Тодруулбал, аврагч-усчин, шумбагчийн шумбалтын өмнөх болон дараах үеийн даралтыг тэнцвэржүүлэх, даралтын огцом өөрчлөлтөөс урьдчилан сэргийлэхэд ашигладаг байна.
Мөн угаарын хийн хордлогод өртсөн иргэдийг өндөр даралтын хүчилтөрөгчийн эмчилгээнд хамруулахад ашиглах боломжтой.
Эх сурвалж: Онцгой байдлын ерөнхий газар
