НҮБ-ын Ерөнхий Ассамблейн 79 дүгээр чуулганаар Монгол Улсын Ерөнхийлөгчийн санаачилсан “Дэлхийн адууны өдөр”-ийг тэмдэглэх тогтоол батлагдсантай холбогдуулан Монгол Улсад анх удаа зохион байгуулж буй “Монголын нүүдэлчид ба адуу” олон улсын эрдэм шинжилгээний хурал өнөөдөр Чингис хаан Үндэсний музейд эхэллээ.
Хурлыг нээж Соёл, спорт, аялал жуулчлал, залуучуудын сайд Ж.Алдаржавхлан хэлсэн үгэндээ “Адуу бол хүн төрөлхтний хөгжлийн түүхийг бүтээлцсэн үнэт өв бөгөөд Монгол нутаг Төв Азийн адууны соёлын хамгийн эртний ул мөрийг өөртөө агуулсан түүхэн үнэ цэн бүхий газар юм” хэмээн онцлов.
Мөн “Дэлхийн адууны өдөр”-ийг тохиолдуулан зохион байгуулж буй энэхүү олон улсын эрдэм шинжилгээний хурлыг цаашид уламжлал болгон хөгжүүлж, Монголын нүүдлийн соёл, адууны өвийг шинжлэх ухааны үндэслэлтэйгээр дэлхийд сурталчлах нь чухал болохыг тэмдэглэлээ.
Энэ удаагийн хурлыг Монгол Улсын Ерөнхийлөгчийн Тамгын газар, Соёл, спорт, аялал жуулчлал, залуучуудын яам, Чингис хаан Үндэсний музей, Кембрижийн их сургуулийн Монгол судлалын төв, Үндэсний их баяр наадмыг зохион байгуулах комисс хамтран зохион байгуулж байна.
Хуралд Монгол, Их Британи, ОХУ, Казахстан, Япон зэрэг улсын 30 гаруй эрдэмтэн, судлаач оролцож, адууны соёлын өв, археологи, түүх, генетик, эдийн засаг, худалдааны чиглэлээр хийсэн судалгааны үр дүнгээ хэлэлцэж байна.
