Улсын Их Хурлын 2026 оны хаврын ээлжит чуулганы хугацаанд Байнгын хорооны тогтоолоор байгуулагдсан хууль тогтоомжийн биелэлтэд хяналт шалгалт хийж санал, дүгнэлт гаргах, шаардлагатай бол шийдвэрийн төсөл боловсруулах үүрэг бүхий 4 ажлын хэсэгт давхардсан тоогоор Улсын Их Хурлын 35 гишүүн ажиллаж, УИХ-ын Тамгын газрын Хяналт шалгалтын газраас мэргэжил, арга зүй, зохион байгуулалтын туслалцаа үзүүлэн ажиллажээ.
Ажлын хэсгүүд санал, дүгнэлтээ холбогдох Байнгын хороодод танилцуулж, Улсын Их Хурлын тогтоолоор Засгийн газарт чиглэл өгсөн байна.
Байгаль орчин, хүнс, хөдөө аж ахуйн байнгын хорооны 2025 оны 18 дугаар тогтоолоор байгуулагдсан Хог хаягдлын тухай хуулийн хэрэгжилтийг хянан шалгах, холбогдох шийдвэрийн төсөл боловсруулах, санал, дүгнэлт гаргах үүрэг бүхий ажлын хэсгээс “Засгийн газарт чиглэл өгөх тухай” 27 дугаар тогтоол, Өргөдлийн байнгын хорооны 2026 оны 02 дугаар тогтоолоор байгуулагдсан Орон сууц захиалж хохирсон иргэдээс ирүүлсэн өргөдөл, холбогдох хууль тогтоомжийн биелэлтийг шалган судалж санал, дүгнэлт гаргах, шаардлагатай бол шийдвэрийн төсөл боловсруулах үүрэг бүхий” ажлын хэсгээс “Засгийн газарт чиглэл өгөх тухай” 53 дугаар тогтоолыг УИХ-аар тус тус хэлэлцүүлэн батлуулжээ.
“Нийслэлийн 2024-2026 оны төсвийн зарцуулалт, хөрөнгө оруулалтын төслүүдийн хэрэгжилт холбогдох хууль тогтоомжид нийцсэн байдал” сэдвээрх ерөнхий хяналтын сонсголыг Монголын үндэсний олон нийтийн радио, телевиз болон Улсын Их Хурлын цахим сувгаар шууд дамжуулж, дохионы хэлмэрчтэйгээр хүргэсэн бөгөөд 2 өдрийн сонсголд давхардсан тоогоор нийт 182 оролцогч оролцож, санал, тайлбар, мэдээлэл өгчээ.
“Малчны тухай хуулийн хэрэгжилтийг дүгнэх, хууль тогтоомжийг хэрэгжүүлэх чиг үүрэг бүхий байгууллага, түүний удирдах албан тушаалтны үйл ажиллагаанд хяналт тавих, үнэлэх” сэдвээрх ерөнхий хяналтын сонсголыг Монголын үндэсний олон нийтийн радио, телевиз, Малчин телевиз болон Улсын Их Хурлын цахим сувгаар шууд дамжуулж, дохионы хэлмэрчтэйгээр хүргэсэн бөгөөд 2 өдрийн сонсголд давхардсан тоогоор нийт 163 оролцогч оролцож, санал, тайлбар, мэдээлэл өгсөн байна хэмээн Улсын Их Хурлын Хэвлэл мэдээлэл, олон нийттэй харилцах газраас мэдээллээ.
