Дэлхийн цаа бугын малчдын VIII их хурал Хөвсгөл аймгийн Цагааннуур суманд эхэллээ. Энэ удаагийн их хуралд Монгол Улс, Норвеги, Швед, Финланд, Канад, АНУ-ын Аляска, Гренланд, БНХАУ, Шотланд зэрэг улс, бүс нутгийн цаа бугын аж ахуй эрхлэгчид, эрдэмтэн судлаачид, олон улсын байгууллагын төлөөлөгчид оролцож байна.Их хурлын хүрээнд цаа бугын аж ахуйн өнөөгийн нөхцөл байдал, бэлчээрийн доройтол, уур амьсгалын өөрчлөлтийн нөлөө, уугуул иргэдийн уламжлалт мэдлэг, өв соёлыг хадгалан хамгаалах, тогтвортой хөгжлийг дэмжих чиглэлээр хэлэлцүүлэг өрнүүлж, олон улсын хамтын ажиллагааг бэхжүүлэх асуудлыг хэлэлцэнэ.Нээлтийн үйл ажиллагаанд аймгийн Засаг даргын орлогч Ц.Гансүх оролцож, Хөвсгөл аймгийн Засаг дарга болон аймгийн Засаг даргын Тамгын газрын нэрийн өмнөөс их хурлын төлөөлөгчдөд мэндчилгээ дэвшүүлэн, үйл ажиллагаанд нь амжилт хүслээ.Дэлхийн цаа бугын малчдын VIII их хурал наймдугаар сарын 6-8-ны өдрүүдэд үргэлжлэх бөгөөд конгрессын нэгдсэн болон салбар хуралдаан, мэргэжлийн хэлэлцүүлгүүд зохион байгуулагдаж, “Цагааннуурын тунхаглал”-ыг хэлэлцэн батална.Мөн Духа цаатан иргэдийн түүх, өв соёл, уламжлалт аж ахуйг сурталчлах үзэсгэлэн, соёл урлагийн тоглолт, цаа бугын уралдаан, үндэсний уламжлалт тэмцээн, гар урлалын үзэсгэлэн, худалдаа зэрэг олон нийтэд зориулсан арга хэмжээнүүд зохион байгуулагдах юм.