УИХ-ын Төрийн байгуулалтын байнгын хорооны хуралдаанаар Монгол Улсын Ерөнхийлөгч У.Хүрэлсүх-ийн өөрийн хүсэлтээр үүрэгт ажлаасаа чөлөөлөгдөх асуудлыг хэлэлцэж байна.
УИХ-ын гишүүн Б.Жавхлан "Монгол Улсын Ерөнхийлөгч өөрийн гаргасан хүсэлтийн дагуу үүрэгт ажлаасаа чөлөөлөгдөх тухай хүсэлтээ Улсын Их Хуралд ирүүлсэн. Уг асуудлыг судлан дүгнэх үүрэг бүхий ажлын хэсэгт УИХ-ын гишүүн Н.Алтанхуяг, Ж.Мөнхбат нар ажилласан.
Ерөнхийлөгчийн ирүүлсэн хүсэлтэд Монгол Улсын Ерөнхийлөгчийн тухай хуулийн 6 дугаар зүйлийн 3.1 дэх хэсгийг үндэслэл болгож, Үндсэн хуулийн 25 дугаар зүйлийн 1.5 дахь заалтад заасны дагуу үүрэгт ажлаасаа чөлөөлөгдөх асуудлыг хэлэлцэн шийдвэрлэхийг хүссэн байна.
Монгол Улсын Ерөнхийлөгчийн тухай хууль, 6 дугаар зүйл, 3.1 дэх хэсэг
6.3.1. Монгол Улсын Ерөнхийлөгч биеийн эрүүл мэндийн байдал болон хүндэтгэн үзэх бусад шалтгаанаар бүрэн эрхээ хэрэгжүүлэх боломжгүй болсон гэж үзвэл Улсын Их Хуралд хүсэлт гаргаж, үүрэгт ажлаасаа чөлөөлөгдөж болно.
Монгол Улсын Үндсэн хууль, 25 дугаар зүйл. 1.5 хэсэг
Монгол Улсын Ерөнхийлөгчийг сонгох, чөлөөлөх, огцруулах асуудлыг хэлэлцэж шийдвэрлэх нь Улсын Их Хурлын онцгой бүрэн эрх мөн.
Байнгын хорооны хуралдаанд оролцсон гишүүдийн дунд санал хураалт явуулахад 18 гишүүнээс 14 нь дэмжиж, 77.8 хувийн саналаар Монгол Улсын Ерөнхийлөгчийг үүрэгт ажлаас нь чөлөөлөх тухай саналыг зөвшөөрлөө.
Монгол Улсын Үндсэн хуульд заасны дагуу шинэ Ерөнхийлөгч тангараг өргөх хүртэл Ерөнхийлөгчийн бүрэн эрхийг Улсын Их Хурлын дарга хэрэгжүүлнэ. Энэ хугацаанд Ерөнхийлөгчийн эрх, үүргийг бүрэн хэмжээгээр хэрэгжүүлэх зохицуулалт үйлчилнэ.
Иймд Монгол Улсын Ерөнхийлөгчийг үүрэгт ажлаас нь чөлөөлөх, шинэ Ерөнхийлөгч тангараг өргөх хүртэл Ерөнхийлөгчийн бүрэн эрхийг Улсын Их Хурлын дарга хэрэгжүүлэх тухай тогтоолын төслийг танилцуулж байна" гэв.

























