АНУ-ын Ерөнхийлөгчийн сонгуулийн санал хураалт эхнээсээ дуусч, зарим муж дүнгээ гаргаж эхэлсэн байна. Урьдчилсан дүнгээ гаргасан зарим мужийн гуравт нь буюу Индиана, Кентаки, Баруун Виржинияд Митт Ромни ялалт байгуулсан гэдэг мэдээ ирсэн бол Вермонт мужид Барак Обама ялсан байна.    Сонгуулийн дүнг шийдэхэд маш чухал үүрэгтэй сонгуулийн коллегийн саналаар ч Митт Ромни тэргүүлж яваа гэнэ. Одоогоор М.Ромни коллегийн гишүүдийн 24-ийнх нь дэмжлэгийг авсан бол Б.Обама гурвыг өөрийн болгожээ. Гэхдээ сонгуулийн ерөнхий дүнг эхэн үеийн мужуудын дүнгээр төсөөлвөл учир дутагдалтай юм. Сонгуулийн дүнг шийддэг савлагаатай тойрогт нэр дэвшигчдийн хэн нь олонхийн санал авснаар ялагч нь тодордог учиртай.  Охайо зэрэг тэдгээр мужуудын дүн хараахан гараагүй байгаа учир ялагчийг тааварлах хэтэрхий эрт байна.
Сонгуулийн ирцийн талаарх дүн мэдээ хараахан гараагүй байгаа ч америкчууд энэ удаагийн сонгуульд маш идэвхтэй оролцож буйг ажиглагчид тэмдэглэж байна. Сонгууль эхлэхээс өмнө гэхэд 30 сая гаруй иргэн урьдчилан саналаа өгөөд байсан юм.
Бүгд найрамдах намын нэр дэвшигч Митт Ромни эцсээ хүртэл сонгуулийн сурталчилгаагаа хийж, савлагаатай мужуудад өөрөө очиж байсан бол Барак Обама сонгуулийн өдөр төрөлх Чикаго хотдоо нам гүм байдалтай, сонгуулийн дүн хүлээж суугаа гэнэ. Сонгуулийн урьдчилсан дүн хэдхэн цагийн дараа нэгдсэн байдлаар гарна гэж мэдээлж байна.