АНУ-ын Тагнуулын төв газрын дарга генерал Дэвид Петраусыг суудлаасаа огцроход хүргэсэн шалтгаан улам бүр тодорхой болж ирж байна. Д.Петраус гэр бүлээсээ гадуур Пола Бродвел хэмээх эмэгтэйтэй нууц амрагийн холбоо тогтоогоод зогсохгүй тэр нь генералыг өөр нэг эмэгтэйтэй хардаж, нууц хаягнаас сүрдүүлсэн цахилгаан шуудан хүртэл илгээсэн нь Холбооны мөрдөх товчооны шалгалтаар илэрсэн юм. Үүнээс болж Д.Петраус албан тушаалаасаа огцорсон ч Пола Бродвел чухам түүнийг хэнтэй хардаж, и-мэйл илгээсэн нь тодорхойгүй байсан юм. Тэгвэл Пола Бродвел Жил Келли хэмээх эмэгтэй рүү и-мэйл бичсэн нь тодорхой болжээ. Жил Келли бол  Дэвид Петраусын гэр бүлийн найз бөгөөд АНУ-ын армид сайн дурын элчээр ажилладаг нэгэн байж. Тэд дотно найзууд учраас Пола Бродвел нууц амрагаа түүнтэй хардаж “Миний залуугаас холд” гэх мэтийн үгтэй цахилгаан шуудан илгээсэн байна. Энэхүү сүрдүүлсэн и-мэйлд цочирдсон Жил Келли Холбооны мөрдөх товчоонд хандаж, хэн илгээсэн болохыг шалгаж өгөхийг хүсчээ. Энэ дагуу Холбооны мөрдөх товчоо шалгахад генерал Дэвид Петраус, Пола Бродвелын нууц харилцаа илэрсэн байна.


Пола Бродвел бол өнгөрсөн нэгдүгээр сард генерал Дэвид Петраусын тухай “All In” хэмээх ном гаргаж байсан, түүнтэй ойр дотно хамтран ажилладаг нэгэн юм. Тэрээр Дэвид Петраусыг Ирак дахь АНУ-ын цэргийн командлагчаар ажиллаж байх үеэс түүний тухай ном бичих баримт материал цуглуулахаар байнга холбогдож, уулздаг байж. Гэхдээ тэд жил гаруйн өмнөөс буюу Д.Петраусыг Тагнуулын төв газрын даргаар томилогдсоноос хойш дотно харилцаатай болсон гэнэ. Пола Бродвел генералтай уулзахаар Тагнуулын төв газрын төв байранд байнга ирдэг, зарим хориотой газраар хүртэл түүнтэй хамт явдагт “CIA”-гийн ажилтнууд таагүй ханддаг байсан ч даргадаа энэ тухай хэлж чаддаггүй байж. Тэр бүү хэл Пола Бродвел Д.Петраусын G-mail хаягийг ашиглаж энэ бүх мэйлийг илгээж байсан нь илэрсэн байна.


Энэ бүгдийг Холбооны мөрдөх товчооныхон илрүүлсэн боловч генерал Дэвид Петраусын үйлдэлд хууль зөрчсөн зүйл байхгүй болохоор ямар арга хэмжээ авахаа мэдэхгүй байжээ. Тиймээс тэд Үндэсний аюулгүй байдлын захирал Жеймс Клапперт энэ тухай мэдэгдэхэд тэрээр Дэвид Петраустай холбогдож өөрийн хүсэлтээр огцрохыг санал болгожээ. Үүнээс нэг өдрийн дараа буюу өнгөрсөн пүрэв гаригт Д.Петраус Ерөнхийлөгч Б.Обаматай уулзаж, огцрох өргөдлөө өгсөн бөгөөд баасан гаригт түүний хүсэлтийг ёсоор болгосон юм. Энэ тухай Д.Петраус мэдэгдэхдээ “Миний гаргасан энэ үйлдэл гэр бүлийн эзэн, эр нөхрийн хувьд төдийгүй манайх шиг ийм байгууллагын удирдагч хүний хувьд байж боломгүй хэрэг” гэдгийг ойлгож ухаарснаа хэлсэн юм. Гэвч түүнийг хоёр хүүхдийнх нь ээж, 38 жил ханилсан эхнэр Холли нь уучлах эсэхийг хэн ч хэлж мэдэхгүй юм.  Тэд хоёр хүүхэдтэй бөгөөд хүү нь Ирак дахь АНУ-ын цэргийн хүчний явган цэргийн ангийг ахалдаг ажээ.