Виктория Секрет компани Америкийн уугуул иргэд индианчуудаас уучлал гуйжээ. Тус компани өнгөрсөн долоо хоногт болсон шинэ загварын шоундаа уугуул иргэдийн уламжлалт хувцас, малгайн гоёлыг ашигласан нь индианчуудын соёл,  зан заншлыг үл хүндэтгэсэн явдал гэсэн шүүмжлэл хүлээсэн юм. Загвар өмсөгч Карли Клосс Виктория Секретийн шинэ загварын дотуур хувцсыг индианчуудын малгайн гоёлтой хослуулан тайзнаа гарсан юм. Хэдийгээр энэхүү загвар жирийн үзэгчдийн таашаалд нийцсэн боловч ёс уламжлалаа дээдэлдэг индианчуудын хувьд ил задгай хувцасласан хүүхнүүдэд омгийнхоо ахлагч, ахмад настнуудын дээд гоёл болсон малгайг өмсгөх тийм ч таатай санагдаагүй ажээ. Тиймээс Виктория Секрет компани энэ алдаагаа дор нь залруулж, индианчуудаас уучлал гуйсны дээр загвар өмсөгч Карли Клосс ч Twitter хуудсаараа дамжуулан хүлцэл өчсөн байна. Ирэх сарын 4-нд телевизүүдээр дамжуулах Виктория Секретийн шоу нэвтрүүлгийн бичлэгт ч засвар хийж, индианчуудын малгайгүйгээр нэвтрүүлэхээр болжээ.