Пакистаны Лахор хотод 16 хүн ханиадны сиропноос бол нас баржээ. Энэ явдал өнгөрсөн баасан гаригаас ням гаригийн хооронд болсон бөгөөд одоо сиропыг үйлдвэрлэгч эмийн үйлдвэрийг хааж лацдан, гурван хүнийг баривчлаад байгаа аж.  Сиропны найрлагад чухам юу байсан болоод ингэж олон хүнийг үхэлд хүргэсэн нь одоогоор тодорхойгүй байна. Мэргэжилтнүүд сиропыг шинжилж байх хооронд эмийн сангуудаар тарсан хэсгийг нь хураан авчээ. Ханиадны эмэнд хордож нас барагсдын дийлэнх нь мансууруулах бодист донтогчид байсан хэмээн цагдаагийнхан мэдэгдсэн учраас магадгүй тэд сироп дээр ямар нэг мансууруулах бодис нэмж хэрэглэсэн байхыг үгүйсгэхгүй байна. Гэхдээ ер нь Пакистанд чанаргүй, хортой, стандартын шаардлага хангахгүй эм, тарианд хордсон явдал цөөн биш гардаг. Өнгөрсөн нэгдүгээр сард гэхэд мөн Лахор хотод 100 гаруй хүн зүрхний тарианд хордог нас барсан харамсалтай явдал гарч байсан юм.