Египетийн нийслэл Каирын төв Тахрирын талбайд Үндсэн хуулийн тунхгийг эсэргүүцсэн жагсаал цуглаан үргэлжилсээр байна. Өнгөрсөн шөнө жагсагчид цагдаагийнхантай мөргөлдөх үеэр хоёр ч хүн нас барсан талаар телевизийн Аль-Жазира суваг мэдээллээ. Нэг эрэгтэй нь нулимс асгаруулагч хийнд хордож эмнэлэгт очоод нас барсан бол нөгөөгийнх нь тухай мэдээлээгүй байна.
Тус улсын ерөнхийлөгч Мухаммед Мурсигийн өргөн бариад байгаа Үндсэн хуулийн тунхгийг эсэргүүцсэн жагсаал цуглаан ганцхан нийслэлд ч биш Александрия, Суэц, Эль-Минья зэрэг бусад хотуудад ч болж байна. Ерөнхийлөгчийн энэ шийдвэрийг зөвхөн ард түмэн ч биш ерөнхийлөгчийн өөрийнх нь зөвлөхүүд ч хүлээн зөвшөөрөхгүй ерөнхийлөгчийн албанаас ээлж дараалан гарсаар байгаа юм байна. Эхлээд ерөнхийлөгчийн ардчилсан өөрчлөлт хариуцсан туслах, христийн зүтгэлтэн Самир Маркус гарсан бол түүний араас нийтлэлч Сакина Фуад ч бас дагажээ. Одоо шүүх прокурорын ажилтнууд ч ажлаа зогсоож гудамжинд гарч жагсагчидтай нийлжээ.