АНУ-ын Конгрессын хянан шалгах хорооноос нэг долларын дэвсгэртийг халж, оронд нь зоосон мөнгө хэрэглэж байхыг хууль тогтоогчдод уриаллаа. Яагаад гэж үү. Учир нь, цаасан дэвсгэртийн оронд зоосон мөнгө ашиглах нь АНУ-ын эдийн засагт тустай, таван тэрбум гаруй ам.доллар хэмнэнэ гэдэг тооцоо хийжээ.
Одоо ч мөнгөний эргэлтэнд орж яваа нэг долларын зоосон мөнгийг үйлдвэрлэх өртөг нь 30 цент байдаг бөгөөд Засгийн газар үүнийг нэг доллараар зардаг. Үүгээр тооцвол АНУ-ын Засгийн газар 30 жил тутамд 4,4 тэрбум ам.доллар хэмнэхээр байгаа аж. Учир нь, зоосон мөнгөний эдэлгээ 30 жил гэж тооцдог юм.
Харин 1-тийн долларын дэвсгэртийн тухайд зоосон мөнгөнөөс харьцангуй хямд өртгөөр буюу таван центээр үйлдвэрлэдэг. Гэвч эдэлгээний хувьд нас богинотой. Ердөө 4,7 жил л хэрэглээд ашиглах боломжгүй болдог байна.  Иймээс л мөнгө санхүүгээ хэмнэх үүдээс цаасан мөнгөний оронд зоосон мөнгө хэрэглэе гэдэг саналыг Конгрессын хянан шалгах хорооноос гаргажээ. Энэ тухай Конгрессын Санхүүгийн үйлчилгээний хороо өнөөдөр хэлэлцэх юм байна.
Гэхдээ цаасан мөнгөний оронд зоосыг хэрэглэе гэдэг санал шинэ зүйл огт биш. Өнгөрсөн 20 гаруй жилийн хугацаанд энэ тухай яриа байсхийгээд л гардаг, тэгсгээд өнгөрдөг байсан юм. Тийм ч учраас зоосон мөнгөний эрэлт хэрэгцээ маш бага байдгаас Холбооны төв банк дахв 1-тийн зоосон мөнгөний нөөц 1,4 тэрбумд хүрчихээд, одоогоор нэмж зоосон мөнгө үйлдвэрлэхгүй байгаа аж.