Японы нийслэл Токиогоос холгүй орших авто замын тунель нурсны улмаас есөн хүн амь үрэгдээд байна. Токиогоос баруун зүгт 80 километр зайд орших Сасаго хэмээх уг тунелийн бетонон хавтан унаж, түүгээр явсан нэлээд хэдэн автомашиныг даржээ. Аврагчид одоогоор гурван машинаас есөн хүний цогцос гаргаад байна. Амь үрэгдэгсдийн тав нь нэг машинд сууж явсан 20 гаруй насны залуус бөгөөд хоёр эмэгтэй, гурван эрэгтэй байжээ.  Харин үлдсэн хохирогчдын хувьд гурав нь нэг машин, нэг хүн ачааны машинтай тунелиэр зорчиж явжээ.

Ослоос амьд гарсан хүмүүс ч байгаа бөгөөд зарим нь аврагчид ирэхээс өмнө тунелиэс явганаар гарч иржээ.  Ослын дараа хавтанд дарагдсан машинаас гал гарч улмаар тунельд түймэр дэгдсэн учир амь үрэгдэгсдийн тоо нэмэгдэж магадгүй гэж албаны хүмүүс мэдээллээ.

Зам барилга, дэд бүтцийн чанар чансаагаараа дэлхийд үнэлэгддэг Японд яагаад ийм осол гарав гэдэг олны анхаарлыг их татаж байна. Тэр дундаа замын хөдөлгөөний ачаалал ихтэй, гол замын тунельд ийм зүйл тохиолдсоныг хэвлэлүүд гайхаж байна. 4,3 км үргэлжилдэг, уртаараа Японд  дээгүүрт ордог уг тунелийг нэгэн хувийн компани ажиллуулдаг бөгөөд хоёрхон сарын өмнө үзлэг шалгалт хийхэд ямар нэг ноцтой асуудал байгаагүй гэнэ. Осол өглөөний найман цагийн үед гарч, түүгээр явсан ачааны машины жолооч дуудлага өгчээ.