Иргэний дайн, зэвсэгт мөргөлдөөний хөлд хоёр жил шахам зовж зүдэрч байгаа Сирийн ард иргэд аюулгүй байдалдаа санаа зовнихын хажуугаар амь зогоох хоол хүнс хаанаас олох билээ хэмээн толгой гашилгаж байна. Хүнсний гол хэрэгцээ болсон гурил, талх, нарийн боов хомсдсоноос иргэд өлмөн зэлмэн өдөр хоногийг өнгөхөөрөөд хүрчээ.  
Ялангуяа сүүлийн зургаан сар армийн бүслэлт дор байгаа Хомс хотын босогчид байрладаг дүүрэгт гурилны хомсдолд орсноор амаа хөдөлгөхөд тун бэрх болсон байна. Хүмүүс бөмбөгдөлтөд өртөж эсвэл эзэд нь дүрвэсэн байшингаас гал түлчихмээр мод түүж, хугацаа нь дууссан хуучин гурилаар талх хийж байгаа гэнэ. Талх, нарийн боовны газрууд ихэнх нь хаалгаа барьсан, ажиллаж байгаа нэгнээс талх авахын тулд шөнийн цагаар хүртэл 2-3 цаг дараалалд зогсох хэрэг гарч байгаа аж. Ингэж зогсч байж авсан талх, бин нь хоёр ам.доллартай тэнцэхүйц үнэтэй болоод байгаа гэнэ. Зарим хүмүүс дараалалд зогсч байж авсан бингээ өөр газарт 2-3 нугалан зарах явдал ч их байгаа аж. Ийнхүү талх, бингийн үнэ өссөн нь гурилын нөөцийг хамгаалалтад авснаас хар зах дээр түүхий эдийг нь өндөр үнээр дамлан наймаалж байгаатай холбоотой. Мөн үймээн самууны улмаас бензин шатахууны үнэ дөрөв дахин өссөн нь хамгийн их нөлөөлсөн хэмээн талх үйлдвэрлэгчид тайлбарлаж байна.