Венесуэлийн Ерөнхийлөгч Уго Чавес яг одоо Кубын Гавана хотод хорт хавдрын мэс засалд орж байна. Үүгээр У.Чавес хорт хавдар авахуулах мэс засалд дөрөв дэх удаагаа орж байна.  Анх тэрээр өнгөрсөн оны зургадугаар сард хорт хавдартай гэж оношлогдсон юм. Венесуэлийн Ерөнхийлөгч чухам ямар төрлийн хорт хавдар туссан нь тодорхойгүй ч аарцагны хөндийд мэс засал хийлгэсэн гэдэг мэдээлэл өмнө нь гарч байсан юм.
Хэрэв ямар нэгэн зүйл тохиолдвол У.Чавесыг залгамжлах хүн гэж зарлаад байгаа Венесуэлийн дэд Ерөнхийлөгч Николас Мадуро саяхан телевизээр ард түмэндээ мэдэгдэл хийж Ерөнхийлөгч яг одоо хагалгаанд орсон, түүний мэс засал амжилттай болно гэдэгт эмч нар нь итгэлтэй байгаа хэмээн венесуэльчүүдийг тайвшруулжээ.  
Өнгөрсөн долдугаар  сард хорт хавдар өвчнөөс ангижирсан гэдгээ баяр хөөртэйгөөр зарлаж байсан У.Чавес өнгөрсөн долоо хоногт Куба руу явж оношлуулахдаа хорт хавдар нь дахисан болохыг олж мэдсэн юм. Ингээд Үндэсний ассамблейгаасаа чөлөө хүсч, өнгөрсөн даваа гаригт Кубыг дахин зорьсон билээ.
У.Чавес ийнхүү эрүүл мэндийн хувьд амаргүй өдрүүдийг туулж байгаа ч хэдхэн сарын өмнө болсон сонгуулиар венесуэльчүүд түүнд итгэл хүлээлгэн дахин сонгосон. Түүний дөрөв дэх Ерөнхийлөгчийн бүрэн эрхийн хугацаа ирэх оны нэгдүгээр сарын 10-наас эхлэх ёстой юм.