Эртний майяачуудын он тооллыг буруугаар тайлсан үгэнд итгэж, дэлхий сөнөх нь хэмээн айж эмээж явсан хүмүүс хорвоогийн эгэл жирийн нэгэн шаргал нартай өдрийг угтадгаараа угтсан энэ өдөр НАСА-гаас дэлхий нийтийг тайвшруулах бас нэг мэдэгдэл хийлээ. Тэр бол ойрын хугацаанд манай дэлхийг сансрын өөр ямар нэг од гариг дайрах магадлал байхгүй тухай мэдэгдэл байв.
Олон нийтийн дунд тархаад байгаа мэдээллээр бол 2040 оны хоёрдугаар сард  “2011 AG-5” хэмээх сүүлт од манай дэлхийг мөргөж, сүйрэлд хүргэх аюултай гэцгээж буй. Тэгвэл НАСА-гийн эрдэмтэд энэ тухай нарийвчлан судлаад тус сүүлт одны манай дэлхийтэй мөргөлдөх магадлал ердөө нэг хувь гэж тооцон гаргажээ. “Дэлхийтэй ойролцоо обьектууд” хэмээн манай гаригтай ойр орших, мөргөлдөх магадлалтай од гаригсыг судалдаг судалгааны төв  “Gemini 8” хэмээх өндөр хүчин чадалтай телескопын тусламжтайгаар Хавайд судалгаа хийгээд “2040 оны хоёрдугаар сард манай дэлхийн байрлал “2011 AG-5” одтой ойролцоо оршихгүй. Тэр үед дэлхий тус одноос хамгийн ойрдоо гэхэд 890 мянган километрийн алсад буюу сарнаас хоёр дахин хол зайд байх болно” гэж мэдэгджээ. Тэгэхээр ойрын ирээдүйд дэлхийг гадны ямар нэгэн биет мөргөж, сөнөөх магадлал байхгүй тул санаа амар байж болох нь.
Хэрэв дэлхий гадны ямар нэг биетэд мөргүүлж, эсвэл сүүлт од харван орж ирвэл 100 мегатонтой тэнцэхүйц энерги ялгарах гэнэ. Энэ нь Дэлхийн хоёрдугаар дайны үед хаясан атомын бөмбөгнөөс хэдэн мянга дахин хүчтэй гэсэн үг юм.
Манай дэлхийг сөнөөж магадгүй гэж цуурхаад байгаа энэхүү сүүлт од 140 метрийн голчтой гэнэ.