Хүний наймааны золиос болох гэж байсан бага насны 90 хүүхдийг  Хятадын эрх баригчид аварч чөлөөлсөн байна. Тус улсад хүүхэд наймаалдаг нууц сүлжээний хэрэгт сэжиглэн сүүлийн хэдэн өдөрт 350 орчим хүнийг баривчлаад байна. Одоо энэ  хүүхдүүдийг ДНК-гийн шинжилгээнд оруулж эцэг эхийг нь олж тогтоох ажил хийж байна.
Хууль сахиулах байгууллагын мэдээлснээр Хятадад жил бүр хэдэн зуу, хэдэн мянган хүүхэд хүний наймааны золиос болон худалдагддаг байна. Гэмт хэргийн бүлэглэлийнхэн бага насны хүүхдийг хулгайлж хүүхэдгүй хосуудад худалдсаар байгаа юм.  Хууль бус наймааны зах дээр хүүхэд дор хаяж зургаан мянган доллар хүрдэг бол эмэгтэй хүүхэд заримдаа 500 доллар хүрэх нь байдаг гэнэ.
Өнгөрсөн онд Хятадын Шаньдун мужийн Зоу хотод эцэг эх нь татгалзсан нялх  хүүхэд худалдаалдаг гэмт хэргийн бүлэглэлийг илрүүлэн баривчилсан юм. Сүүлийн гурван жилд энэ бүлэглэл 11 удаагийн ийм гэмт үйлдэл гаргажээ. Энд байсан хамгийн бага хүүхэд нь тав хоногтой, арай ах нь сар гарантай байжээ.