“Facebook” компанийн эзэн, дэлхийн хамгийн олон гишүүн бүхий олон нийтийн сүлжээ сайтыг үндэслэгч Марк Зукерберг Facebook хуудастаа 16 сая гаруй найзтай. Марк Зукербергийн найзууд түүнтэй шууд харилцаж болох авч найз болоогүй хүмүүсийн хувьд түүн рүү мессэж илгээхийн тулд 100 доллар төлөх болох нь. М.Зукерберг чухам юунд ийм “найзархаг бус” байдал гаргах болов гэдэг учиртай. “Facebook” компани нэгэн өөрчлөлт хийхээр өөрийнхөө эзэн Марк Зукербергийн хуудсаар туршиж үзэж байгаа нь энэ аж. М.Зукерберг шиг олон сая найзтай хэрэглэгчдийн хувьд заавал үзэж, танилцах шаардлагагүй мессеж өдөрт хэдэн арван мянгаараа ирдэг байна. Тиймээс тэдгээр хэрэглэгчдийг мессежний дарамтнаас ангижруулахын тулд найз болоогүй хүмүүс мессеж бичих гэж байгаа тохиолдолд 100 доллар төлөх босго тавьжээ. Уг нь, “Facebook” анхандаа мессеж шууд илгээх төлбөрийг нэг ам.доллараар тогтоохоор ярилцаж байсан ч М.Зукерберг шиг дэлхий нийтийн танил болсон алдартнуудын хувьд арай өндрөөр босго тавьж үзэхээр шийджээ. Энэхүү өөрчлөлт одоохондоо туршилтын хэмжээнд байгаа бөгөөд үнэхээр хэрэгжих эсэх, хэрэгжвэл мессежний төлбөр хэдэн ам.доллар байх зэрэг нь тодорхойгүй байна.