Австралийн уугуул иргэд буюу аборигенчууд 4000 жилийн өмнө Энэтхэгээс тус нутаг дэвсгэрт нүүдэллэн ирсэн гэдгийг генийн судалгаа харуулжээ. Судлаачид аборигенчуудын генийг Шинэ Гвиней, Зүүн Өмнөд Ази, Энэтхэг хүмүүсийн ДНК-тай харьцуулан судалж ийм дүгнэлтэд хүрчээ. Ингэж судлахад Австралийн уугуул иргэд болон Шинэ Гвинейн хүмүүсийн ген 35-45 мянган жилийн тэртээд холбогдож байгааг ч тогтоожээ. Тэр үед Шинэ Гвинейнхэн болон Австралийн уугуул иргэд нэг газар нутаг дээр амьдарч байсан аж. Харин цаг хугацааны хувьд харьцангуй наана буюу 4000-5000 жилийн тэртээд энэтхэгчүүд болон аборигенчуудын ген олон талаар нийэж байгаа нь судалгаагаар илэрхий батлагджээ.
Австралийн динго нохой ч цаг хугацааны хувьд тэр үед Австралид ирсэн байна гэж судалгааны дүнд дүгнэжээ.