“Apple” компанийн хамгийн сүүлд гаргасан бүтээгдэхүүн болох iPhone5-ын борлуулалт бодсоноос муу байгаа нь тус компанийн хувьцаа унахад хүргэв.  iPhone5-ын борлуулалт сайнгүй байгаагаас энэ оны эхний гурван сарын үйлдвэрлэлийн сэлбэг хэрэгслийн захиалгаа 50 хувиар бууруулсан гэдэг мэдээлэл гадуур тараад байгаа юм. Өөрөөр хэлбэл, “Apple” үйлдвэрлэхээр төлөвлөж байсан iPhone утасныхаа тоо ширхгийг 50 хувиар бууруулж байгаа бололтой.  Японы “Никкей”-гээс гарсан энэ мэдээлэл зах зээлд тармагц “Apple”-ийн хувьцааны үнэ 3,5 хувиар унасан байна.
Ердөө дөрвөн сарын өмнө зах зээлд шуугиантайгаар нийлүүлж эхэлсэн iPhone5 утасны борлуулалт муу байгаа нь смартфоны зах зээл дэх өрсөлдөөн маш хүчтэй байгаатай холбоотой. Ялангуяа “Apple”-ын гол өрсөлдөгч “Samsung”-ын Galaxy S цувралын смартфонууд өндөр гүйлгээтэй байж, зах зээлд эзлэх хувиараа давж гараад байгаа юм. “Galaxy S” цувралын смартфон анх 2010 оны тавдугаар сард худалдаанд гарснаас хойш 100 сая ширхэг зарагдаад байгаа аж. Энэ оны төгсгөл гэхэд “Samsung” компанийн зах зээлд худалдаалсан смартфоны тоо 290 саяд хүрэхээр байгаа бол “Apple”-ийн хувьд 180 саяар тоологдож байна.  
Ер нь, өнгөрсөн есдүгээр сараас хойш тус компанийн хувьцаа 702 ам.доллар байснаас 28 хувиар уначихаад байгаа юм.