МАН хоёр ч лидерээ “амьдарлынхаа” хамгийн хүнд үед үдсэн. Нэг нь намын дарга нөгөө нь намын генсекийн байсныхаа хувьд ялагдал, ялалтыг нь хамтдаа үүрэх ам тангарагтай байсан ч МАН-ын хувь заяаг журмын нөхөддөө хэмээн даатгалаа гэсээр одсон. “Хүнд хүнээс илүү үнэтэй юм гэж юу байхав” гэдэг үгээр энэ хоёртоо амжилт хүсээд гар даллан үлдсэн МАН-ын журмын нөхөд нь магадгүй хааяа хоёр даргаа дурсдаг биз.
МАН-ын дарга, Монгол Улсын Ерөнхий асан С.Баярын хувьд саяхнаас дуу орж, 60 хүрээд ухаажиж, 61 хүрээд юу яана гэж... хэмээн улс төрөөс илүү өөрийн амьдралд санаа тавих болсноо хуучлав. Тэрээр саяхан тав дахь охиноо өлгийдэн авсан.
Гэвч нэгэн цагт энэ хүний гарт 2,7 сая хүнтэй бяцхан Монгол гэж улс байсныг, энэ улсын өчигдөр өнөөдөр түүнтэй салшгүй холбоотой гэдгийг сайхан үгээр л батлахыг хичээсэн н илт байлаа. Уг нь МАН ч тэр Монголын ард түмэн ч тэр түүнээс их зүйл горьдсон. Монголын түүхэн хөгжлийн торгон ирэн дээр хамтарсан Засгийн газар байгууллаа хэмээн тунхаглан олон хүнд горьдлого авчирсан хүн бол яах аргагүй С.Баяр. Гэвч Монгол улс намчирхал, “тамын тогооны үлгэр”-ээс салах нь гэж баярлаж байсан хүмүүсийн чихэнд цэцэг ургуулчихаад арилж өгсөн. Бие тэнхээ минь дийлэхээ болилоо, хайрт дүү Сү.Батболддоо өвлүүллээ гэхэд олон хүн түүнийг өрөвдөж хайрласан. Харамсалтай нь, энэ бол түүний ард түмнээ гэх сэтгэл байсан гэдэгт өнөөдөр эргэлзэхээс өөр яалтай. Явах хүнд ачаа бүү үрүүл гэсэн ардын үгээр түүнийг зүгээр л сайн яваад биеэ эмчлүүлээрэй гээд монголчууд үдсэн нь саяхан. Гэтэл мань хүн өнөөдөр Жэксоны сургуульд Жижиг орны аюулгүй байдлын онцлогийг судалж сууна. Уг нь энэ бол түүний гарт байсан, практик дээр аль хэдийнэ туршсан сэдэв. Одоо ч магадгүй төрийн хамгаалалт, Монгол улсын нууц хоёр түүнийг дагалдаж л яваа. Дээрээс нь намын нөхөддөө ч тэр бүр яриагүй зарим зүйлээ саяхан хэвлэлээр дэлгэсэн нь журмын нөхдийг нь жаахан гомдоосон бололтой. МАН-ын дарга Ө.Энхтүвшин үү, С.Баяр уу гэдэгт намын жирийн гишүүд нь эргэлзэхэд хүргэсэн гэнэ. Учир улстөрийн намуудаас хамгийн ам чангатай, тогоон дотроо буцалж, олгой дотроо хагардаг МАН-ын дарга асан С.Баяр нь намын өнөөгийн дарга Ө.Энхтүвшингээ тогоон дотроо ярих ёстой зүйлээ төвийн хэвлэлүүдээр дэлгэжээ хэмээн буруутгасанд байгаа бололтой. Ерөнхийлөгчийн сонгууль хаяанд ирчихсэн байгаа энэ үед намын удирдах албан тушаалд байсан хүмүүс ам чангатай байх нь юу юунаас илүү чухал гэж үздэг тус намынхан С.Баярыг хэрэгтэй үед хаяад явчихаад ахиад хэрэгтэй үед хэрэггүй зүйл ярилаа хэмээн буруутгаж эхэлсэн гэнэ. Намын жинхэнэ лидер байх хэмжээний нам намба, зангарагтай байх эр ч энэ удаад нам, улс төрөөс илүүтэйгээр залуу эхнэр хөхүүл хүүхэд гэж гүйж байгаад хамтран зүтгэгчид нь таатай хандахгүй байгаа гэнэ. Гэвч МАН-д Ө.Энхтөвшин дарга уу, С.Баяр дарга уу гэх явган яриа, тавьдаггүй зангараг ил биш ч далд байсаар л байна.
