УИХ-ын дэд дарга С.Баярцогт 2008 оноос хойш хөрөнгө орлогынхоо мэдүүлгийг худлаа гаргадаг байсан нь илэрлээ. Мөн их хэмжээний ашиг олж, түүнээсээ татвар төлдөггүй байсан нь ч илчлэгдлээ.  Гэхдээ мань хашир үүнийгээ тайлбарлахдаа, “Би хөрөнгө орлогынхоо мэдүүлгийг үнэн зөв гаргадаг байсан. Одоо тэр дансанд нэг сая доллар биш ердөө гурван сая төгрөгтэй тэнцах евро л байгаа. Үүнийг би хөрөнгө орлогын мэдүүлэгтээ байнга мэдүүлдэг байсан. Харин тэр компанийнхаа нэрийг л бичээгүй нь миний алдаа боллоо. Энэ бол миний мэдлэг дутсаных” гэж хэлж байна. Үнэндээ Монгол Улсын Сангийн сайдаар ажиллаж байсан хүн ийм зүйл мэдэхгүй байна гэвэл ёстой түүхэнд хазгай гээч юм болох байлгүй. Тэгэхээр С.Баярцогт үүнийг мэдээгүй биш мэдсэн, мэдсээр байж санаатайгаар хөрөнгөө нуун дарагдуулсан болж таарч байна.  
Хөрөнгө орлогынхоо мэдүүлэгт тэр гурван сая төгрөгийг дурьдсан гэдэг нь ч худлаа. Сэтгүүлчдийн “Та хөрөнгө орлогынхоо мэдүүлэгт дансанд байгаа гурван сая төгрөгөө дурддаг гэж хэллээ. Хэрхэн яаж оруулсныг хэн яаж нотлох вэ” гэсэн асуултад тэрээр, “Би компанийнхаа нэрийг бичихгүйгээр, дотоодод үйл ажиллагаа явуулж байгаа гурван компанийнхаа жилийн эцсийн орлого дээр гурван сая төгрөгөө нэмээд бичдэг байсан юм. Энэ бол баттай үнэн” гэх.
Бас л эргэлзээтэй зүйл. Бараг ч үндэслэлгүй хариулт болж таарч байгаа биз дээ.
Ямартай ч би буруутай хэмээн алдаагаа ухамсарлаж, хариуцлага хүлээнэ гэдгээ хэлсэн нь эр зориг. Харин түүнд ямар хариуцлага ноогдуулах нь УИХ-ын бүрэн эрхийн асуудал. Авилгын эсрэг хуулийн дагуу бол ажлын газраас нь хариуцлага тооцох л үүрэгтэй. Цалингийн 20 хувиар гурван сар торгохоос эхлээд ажлаас чөлөөлөх хүртэл хариуцлага тооцох механизм бий. Тэгэхээр УИХ-ын гишүүнээс нь түдгэлзүүлнэ гэж байхгүй. Учир нь, олуулаа болж чадаагүй АН-д нэг ч гэсэн суудал хэрэгтэй байгаа. Тэгэхээр УИХ-ын дэд дарга гэдэг албан тушаалаас нь буулгах уу, үгүй юу гэдэг нь л хариу хүлээсэн зүйл болж таарах нь.
УИХ дахь АН-ын бүлгийн дарга Д.Эрдэнэбат ч энэ санаагаа цухуйлгаад авсан.  “УИХ-ын дэд дарга С.Баярцогт алдаа гаргасан уу гэвэл гаргасан. Гэхдээ түүний энэ асуудлыг бүлгийн асуудлаар ярих нь зохисгүй. Энэ бол жижиг асуудал биш. Тиймээс УИХ-ын түвшинд ойрын хугацаанд ярина” гэж хэлсэн. Тэгэхээр ямартай ч АН-ынхан нэгэндээ хариуцлага тооцох нь. Энэ бол тэдэнд олдож байгаа бас нэгэн том нэр хүндийн асуудал ч болж мэдэх юм.
Өөрөөр хэлбэл УИХ дахь суудлаа нэгээр хорогдуулахгүйгээр эвтэйхэн, гэхдээ хатуухан яриад хариуцлага тооцвол “Хүүе, эд чинь өмнөх үеийн УИХ шиг бие биенээ хаацайлаад, улаан цагаан зүтгээд байдаггүй юм байна” гэсэн бодол олон түмэнд төрж АН-ынхан бас нэг оноо авч мэдэх юм.
Гэхдээ бичигч миний бие үүнд нэг л зүйлд олзуурхаад байгаа юм.
Хэрэв С.Баярцогт гадаадад нууц компанитай, түүнийх нь дансанд нэг сая ам.доллар байсан эсэхийг Монголын сэтгүүлчид илрүүлсэн бол яах бол. Магадгүй төрийн өндөр албаны хүнийг гүтгэсэн хэргээр шууд л шүүхэд дуудагдана. Хэвлэлээр баахан шуугина. Тэгснээ хэсэг чимээгүй болно. Үйл явдал эхэлснээс хойш хэдэн сарын дараа шүүх хурал болно, сэтгүүлч төрийн өндөр албан тушаалтныг гүтгэсэн, нэр төрд нь халдсан хэргээр шоронд орно. Бүр ядахад сэтгүүлч байтугай дунд зэргийн бизнесмэн ч төлж дийлэхээргүй төлбөрт унана. Тэр сэтгүүлчийн ажиллаж байсан сонин, сэтгүүл, сайт, телевиз, радио нь түүнээс уучлал гуйж олон нийтэд зарлуулга гаргана. Бас дээрээс нь хэдэн сая төгрөгийн өрөнд унана.
Манай монголд бол үйл явдал ийм л дэс дарааллаар өрнөх байлаа. Гэтэл ашгүй гадаадынхан энэ хэргийг илрүүлсэн нь ямар их аз вэ. Гадаадынхан илрүүлж, хэвлэл мэдээллийн байгууллагын гадаад мэдээний орчуулагч нар түүнийг нь орчуулсан болохоор ямар ч асуудал үүссэнгүй.
Эсвэл түүний хэргийг өөр нэгэн намын нөхөр, жирийн нэгэн иргэн илрүүлж, олон нийтэд хэвлэлийн хурал зарлан мэдэгдсэн бол бас л дээрх замаар явах байв. Яагаад гэвэл шүүх засаглал биеэ даасан гэж байгаа боловч олонхийн халаасанд байсаар байгаа болохоор тэр зарчмаар л явах байв. Ашгүй гадаадынхан илрүүлсэн болохоор...
Эцэст өгүүлэхэд энэ мэдээлэл, үйл явдлыг олон нийт янз бүрээр хүлээж авч байна. Нам, үзэл суртал, итгэл үнэмшлээсээ болоод өөр өөрөөр хүлээн авч байгаа ч ерөнхийдөө л нэг дүгнэлтэд хүрч байна. Энэ бол “Ганц Баярцогт ч биш дээ. Цаана нь манай энэ хоёр том намын олон хүн ийм л байгаа. Эд ерөөсөө 20 жилийн турш “улс орноо ингэж л хөгжүүлсэн улс” гэцгээж байна. Тэднийг хэзээ хэн илрүүлдэг юм бол доо.