Украйнд гурван сар гаруй үргэлжилж, эцэстээ Ерөнхийлөгч В.Януковичийг суудлаас нь унагасан эсэргүүцлийн жагсаал хөдөлгөөн 100 шахам хүний аминд хүрсэн гэдэг мэдээлэл гараад байгаа. Гэвч энэ жагсаал цуглаан бүх хүний хувьд зөвхөн нулимс, цус урсгасан хар бараан явдал байсангүй. Лидия Панкив хэмээх 24 настай эмэгтэй энэ л жагсаал цуглааны үеэр хайраа олжээ. Тэгэхдээ бүр цагдаа залууд дурласан гэнэ.
Лидия жагсаалын үеэр амиа алдсан хоёр найзынхаа үхэлд эмгэнэн гашуудсандаа эрх баригчдын эсрэг жагсаалд нэгдсэн байна. Тэрээр хамгаалалтад эгнээд зогссон цагдаа нарын өмнө эсэргүүцлийн үгээ хэлж байх үед нэгэн найз нь түүний гар утас руу залгажээ. Тэд хоорондоо ярьж чадахгүй байсан тул Лидия найздаа өөрийнхөө өөр нэг утасны дугаарыг өгсөн байна. Чимээ шуугиан ихтэй байсан учраас тэр хоёр ч удаа чангаар утасны дугаар хэлж өгчээ. 
Гэтэл түүний утсанд найзаас нь биш, огт танихгүй хүнээс мессэж ирсэн байна. Тэр мессэжинд “Би чиний өмнө зогсч байсан цагдаа нарын нэг байна. Чамайг найздаа утасныхаа дугаарыг өгөх үеэр цээжлээд авсан юм. Би нэрийг чинь ч мэдэхгүй. Гэхдээ чиний хүчирхэг эсэргүүцэлд автаад бид хамгаалалтаа хойшлуулах үед чамтай гэрлэмээр байгаагаа би ойлгосон. Андрей” гэж бичсэн байжээ.
Лидиягийн цогтой тэмцэл цагдаа залуугийн сэтгэлийг байлдан дагуулжээ. Тэд мессэжээр танилцаад, анхны болзоогоороо жагсаал цуглааны хөлд эмх замбараагүй болсон талбай дээр уулзжээ. Лидия одоо хүртэл яагаад танихгүй залуугийн уулзах хүсэлтэд зөвшөөрснөө мэдэхгүй байгаа ч Андрейтай уулзмагцаа л анхны харцаар дурласан гэнэ. 
