Жил бүрийн зургадугаар сарын 1-тэй зэрэгцэн авто машинынхаа татварыг төлөх гэсэн жолооч нар татварын хэлтэс, банкуудад урт дараалал үүсгэдэг. Хэдийгээр албаныхан зургадугаар сарын 1-нээс өмнө татвараа тушаахыг сануулдаг ч монголчууд юмыг цагт нь тулгаж хийдэг муу зангаа тавьдаггүй. Иймээс НИТХ-ын Тэргүүлэгчдийн 2015 оны нэгдүгээр сарын 26-ны өдрийн 28 дугаар тогтоолоор “Нийслэлд авто тээврийн хэрэгслийн бүртгэл, төлбөрийн тогтолцоог шинэчлэн нэвтрүүлэх журам”-ыг баталсан. Шинэчилсэн журмаар авто тээврийн хэрэгслийн албан татвар, төлбөр хураах ажлыг улсын дугаарын сүүлийн цифрээс хамаарч төлөх зохицуулалт хийжээ. Тухайлбал, жолооч таны авто машины улсын дугаар 1,6 гэсэн тоогоор төгссөн бол нэгдүгээр сард, 2,7 бол хоёрдугаар сард, 3,8 бол гуравдугаар сард, 4,9 бол дөрөвдүгээр сар, 5,0-ээр төгссөн бол тавдугаар сард албан татвар, төлбөр хураамжаа төлөх юм байна. Энэ жилийн хувьд хоёрдугаар сар аль хэдийнэ гараад шувтарч байгаа тул нэг, хоёрдугаар сард татвар төлөх зохицуулалтад орсон жолооч нар гуравдугаар сард төлөх юм. Ингэхдээ ямар нэгэн торгууль хураамж авахгүй хэмээн өчигдөр болсон хурлын үеэр Нийслэлийн Замын цагдаагийн газраас мэдээллээ. Ийнхүү иргэд авто машины улсын дугаараас хамааран саруудад хуваагдан татвараа төлөх нь банк, оношлогооны цэгүүдэд үүсдэг дараалал ачааллыг бууруулах бөгөөд иргэд цаг хугацаа алдахгүй гээд олон давуу талтай болж байгаа юм. Мөн энэ журмаар өмнө нь зөвхөн Улаанбаатар банк оношлогооны цэгүүдэд байршин үйл ажиллагаа явуулж байсан бол одоо Ухаалаг Улаанбаатар төслийн хүрээнд “Smartcar” мэдээллийн системийг өргөжүүлж, нийслэлд бүртгэлтэй тээврийн хэрэгслийн нэгдсэн санг үндэслэн нийслэлийн Мэдээлэл технологийн газар, татварын алба, арилжааны банкуудтай хамтран авто тээврийн хэрэгслийн албан татвар, төлбөрийг онлайн, интернэт, мобайл банкууд шууд төлдөг тогтоолцоонд шилжүүлж байгаа гэнэ.
Энэ жил авто машины татвар нэмэгдэхгүй
Үүнээс гадна импортоор орж ирж байгаа машин тухайн жилийн татвараа бүрэн төлдөг. Тавдугаар сард орж ирсэн ч өмнөх саруудын татварыг төлдөг байсан. Тэгвэл энэ удаад авто тээврийн хэрэгслийг эзэмшигч этгээд нь тухайн онд импортоор оруулж ирсэн тээврийн хэрэгслийг улсын бүртгэлд бүртгүүлэхдээ үлдсэн хугацаандаа ногдох татвар төлбөрийг төлсөн байна хэмээн журамд заасан. Тухайлбал, та долдугаар сард авто машин импортоор оруулж ирлээ гэж бодоход долоогоос арванхоёрдугаар сар хүртэлх хугацааны татвар төлөх боломжтой юм билээ. Мөн энэ жилээс авто машины татвар нэмэгдэнэ нэмэгдэхгүй хэмээн иргэдийг баахан төөрөгдүүлсэн. Тэгвэл энэ жилийн хувьд авто машины татварт ямар нэгэн өөрчлөлт орохгүй юм байна. Журам шинэчлэгдэхээс өмнө Нийслэлийн Засаг даргын захирамжийн дагуу татвар хураах ажлыг 2014 оны гуравдугаар сарын 20-ны өдрөөс эхлэн зургадугаар сарын 24-нийг хүртэл хоёр үе шаттайгаар зохион байгуулдаг байсан. Шинэ журам нь иргэдийн хүлээлт, үйлчилгээний байгууллагуудын ачааллыг бууруулах гэсэн нэгээхэн зохицуулалт бөгөөд ямар нэгэн нэмэгдэх хасагдах төлбөр тооцоо байхгүй гэдгийг албаны хүмүүс хэлсэн. Хэрэв заасан хугацаанд буюу зургадугаар сарын 1-нээс өмнө төлбөрөө төлөөгүй тохиолдолд Замын цагдаагийн газар нь өөрийн эрх мэдлийн хүрээнд авто тээврийн эзэмшигчдэд хариуцлага тооцож, замын хөдөлгөөнд оролцуулахгүй байх хүртэл арга хэмжээ авах юм байна.
Дүүрэг тус бүр 1,5 тэрбум төгрөг замын засварт зарцуулна
Жолооч нар “жил бүр авто машины татвар хэмээн дунджаар 100 гаруй мянган төгрөг өгдөг ч замаа олигтой засахгүй байна, бидний мөнгөөр юу хийдэг байна” хэмээн гомдоллодог. Тэгвэл өнгөрсөн онд авто машины татварын мөнгөөр ямар ажил хийсэн талаар Нийслэлийн Авто замын газрын дарга Б.Нанзаддоржоос тодруулахад “Өнгөрсөн оны тухайд Зам тээврийн яамны хажуугийн замыг өргөтгөн шинэчилж, борооны усны хамгаалалт хийсэн. Мөн ЭХЭМҮТ-ийн 1,2 километр замыг өргөтгөн шинэчилж, хороолол дотор есөн байшилд чулуун зам хийсэн. Ер нь, Авто замын тухай хуулийн 18,5-д заасан байдаг. Хуулийн дагуу төвлөрсөн мөнгийг зам нь буцаан зарцуулахаар НИТХ-аар баталсан. Энэ жил хотын төсөвт төвлөрсөн хөрөнгөөр Гачууртын 11 километр замыг засварлана. Анх 1985 онд ашиглалтад орсон зам. Ашиглалтад орсон цагаас хойш их засвар хийгдээгүй. Мөн Яармагийн эцсийн буудлыг Нисэхийн замтай холбох 4,2 километр замын ажил хийгдэнэ. Түүнчлэн Чингэлтэйн эцсийн буудлаас Долоон буудал хүртэлх 3,2 километр замд өргөтгөл шинэчлэлийн ажил хийнэ. Дээр нь Шарга морьт руу зуслангийн чиглэлийн замын ажил бий. Дамбадаржаагийн салдаг уулзвараас хойшоо чигээрээ яваад Хандгайт, Санзай салдаг зам хүртэлх 13,6 километр замыг өргөтгөн шинэчилж Шарга морьтын гүүрийг өргөтгөн барина. Сүүлийн жилүүдэд нийслэлийн зам эрс сайжирч байгаа” гэж байлаа.
Үүнээс гадна энэ жил нийслэлийн дүүрэгт бүрт 1,5 тэрбум төгрөгөөр хороолол дундах зам засварын ажил хийгдэх юм байна. Ингээд есөн тэрбум төгрөг хороолол дундах замд зарцуулагдана гэсэн үг аж. Харин Багануур, Налайх дүүрэгт тус бүр 200 сая төгрөг Багахангайд 80 сая төгрөгийг зарцуулах юм байна. Нөгөө талаас замын гэрэлтүүлэг үзэгдэх орчин хязгаарлагдмал байдаг хэмээн жолооч нар хэлдэг. Тэгвэл замын гэрэлтүүлгийг сайжруулахад 4,2 тэрбум төгрөг зарцуулна. Мөн хуучин замуудыг сэргээн засварлах, хэвтээ тэмдэглэгээ хийх, явган замын эвдэрсэн хэсэгт засвар хийх зэрэг ажлуудыг дөрөвдүгээр сараас зам барилгын ажил эхлэхээр хийхээр төлөвлөөд байгаа гэнэ.
