Махны үнэ тэнгэрт хадаж Засгийн газар аргагүйн эрхэнд нөөцийн махаа зах зээлийнхээс арай хямд үнээр худалдаанд гаргаж эхэлсэн. Энэ талаар оросын номер-один сайтад ийн бичжээ.

Монголчууд махаа талоноор худалдана

Монголын Засгийн газар улсын нөөцөөс мах гарган иргэдэд худалдаалж эхэллээ. Ингэхдээ  нөөцийн махыг иргэдэд  хямд үнээр худалдах талон олгох юм байна.

Хүнсний бүтээгдэхүүний талоныг Оросын иргэд сайн санаж байгаа. Зах зээлийн шинэчлэлийн эхний жилүүдэд сая сая орос иргэн хүнсний дэлгүүрээс хиам, хүнсний бусад зүйлээ талоноор авдаг байсан. Хүнсний бүтээгдэхүүн хүрэлцээгүй байхад энэ бол зайлшгүй арга хэмжээ байлаа. Харин 2 сая 650 мянган хүнтэй атлаа 40 сая малтай Монголд махыг талоноор худалдана гэхээр нэг л санаанд багтамгүй сонин шийдвэр.  Энэ нь мал мах нь хүрэлцээгүй гэхээсээ илүүтэй үнийн зохиомол хөөрөгдөлтэй холбоотой. Ер нь монголын эдийн засаг тэнцвэргүйжээд  байгааг махны үнэ байнга өсөөд байгаагаас харж болно. Ялангуяа нийслэл Улаанбатарт. Монголын хэвлэлийн мэдээлж байгаагаар өөрсдийнх нь ваучер гэж нэрлээд байгаа талоныг орон нутгийн захиргаа гаргах юм байна. Үүнтэй зэрэгцээд улсын нөөцөөс гуравдугаар сарын 1-нээс эхлэн нийслэлийн 130 дэлгүүрээр мах зарж эхлэх гэнэ.  Ингэж махыг талоноор худалдсанаар улсын нөөцийн махыг иргэдэд шударгаар, тэгш олгох боломж бүрдүүлэх юм байна.
Засгийн газрын дараагийн алхам нь бензинийг талонд оруулах бололтой. Монголчууд шатахуунаа оросоос худалдан авдаг ч үнэ нь байнга өсч байгаа. Хамгийн сүүлд өнгөрсөн арванхоёрдугаар сард  ”Роснефть”  үнэ өсгөнө гэснээс болж бензиний үнэ нэмэгдсэн юм. Монголын сайтуудад “Оросууд ямар ч сонголт өгөхгүй байна” гээд оросуудын энэ алхмыг “дарамт” гэж нэрлэж байна.
Шударгаар хэлэхэд оросын шатахуун экспортлогчдод бол хэнд ч худалдсан үнээ өсгөх нь ялгаагүй л дээ. Оросын дотоодын хэрэглэгчдэд ч гэсэн сонголтгүй байгаа. Монголчуудын хувьд бензиний энэ талон нь хоёр жилийн дараа анхны нефть боловсруулах үйлдвэр барьж, оросоос шатахуун авахаа больсон цагт л өөрчлөгдөх байх. Гэхдээ оросоос түүхий нефть худалдан авна л даа. Тэгэхээр өмнөд буриадынхан бензин авах гэж хил давдаг болох биз хэмээн  http://www.gazeta-n1.ru сайтад бичжээ.