Японы “Тоёота Мотор” компани дэлхийд машин үйлдвэрлэлээр тэргүүлсэн хэвээр байгааг тус компанийн 2012 оны нэгдсэн үзүүлэлт баталлаа. Тоёота өнгөрсөн онд 2011 оноос 22 хувиар илүү буюу 9,75 сая машин үйлдвэрлэсэн байна. Харин Тоёотагийн хамгийн том өрсөлдөгч АНУ-ын “Женерал Моторс” өнгөрсөн онд 9,29 сая машин үйлдвэрлэжээ.  2011 онд Япон, Тайландад тохиолдсон байгалийн гамшгийн улмаас Тоёотагийн худалдаа бага зэрэг саарсан боловч маш хурдан сэргэсэн нь дээрх тооноос харагдаж байгаа юм. Тоёотагийн ашиг орлогод иений өндөр ханш ихээхэн сөргөөр нөлөөлж байсан боловч өнгөрсөн арваннэгдүгээр сараас иений ханш 15 хувиар суларч, үйлдвэрлэгчид таатай болж ирсэн юм. Эдгээр хүчин зүйлийг харгалзан үзвэл Тоёота компани 2012-2013 оны санхүүгийн жилд 780 тэрбум иен буюу 8,6 тэрбум ам.долларын ашиг олохоор урьдчилсан төсөөлөл гараад байна.