АНУ-ын Холбооны мөрдөх товчооны ажилтнууд олон улсын марафон гүйлтийн тэмцээний барианы үеэр болсон дэлбэрэлтийн шалтгааныг судлах хүрээнд бөмбөг дэлбэрсэн газрын ойролцоох барилгуудад үзлэг хийж байна.

Массачусетс мужийн амбан захирагч Деваль Патрик энэ асуудлаарх хэвлэлийн бага хурал дээр хотод аюулгүй байдалын сахиулах  арга хэмжээг чангатгасан тухай мэдээлээд “ Хүмүүсийн үүрдэг цүнх, уутыг нягтлан шалгаж байна.

Хүмүүсийг ч өөрсдийг нь анхааралтай байхыг хүсч байна” гэжээ. Мөн Холбооны мөрдөх товчооны тусгай төлөөлөгч Ричард Делорьерс мөрдөн шалгах ажилд муж, хот, бүс нутгийн хууль сахиулах байгууллагын ажилтнуудыг оролцуулж байгаа гэсэн байна.

Олон улсын марафон гүйлтийн тэмцээнд оролцогсод барианд орж ирэх үеэр хоёр ч удаа бөмбөг дэлбэрч хоёр хүн нас барж хамгийн сүүлийн мэдээгээр 115-150 хүн бэртэж гэмтээд байгаагийн 14 нь хүнд байгаа юм.

Одоо бөмбөг дэлбэрсэн газар буюу хотын төвөөс 5,6 км-ийн радиуст онгоц нисэхийг хориглож хот даяар гар утасны сүлжээг түр хаагаад байна. Энэ нь магадгүй шинэ бөмбөг, тэсрэх бодисыг идэвхжүүлэхэд гар утас ашиглаж магадгүй гэж сэжиглэж байгаатай холбоотой гэнэ.

АНУ-ын Засаг захиргаа үүнийг террорист халдлага гэж үзэж байна. Өнөөдөр өглөөгүүр Саудын арабаас ирсэн нэг хүнийг сэжиглэн баривчлаад байгаа ч тэр нь өөрөө бөмбөгний хэлтэрхийд шархадсан учраас эмнэлэгт харуул хамгаалалттай байна.