АНУ-ын Төрийн нарийн бичгийн дарга Жон Керри Москвад хоёр өдрийн хугацаатай ажлын айлчлалаа эхэллээ. Айлчлах явцад тэрээр Оросын Ерөнхийлөгч Путин, Гадаад хэргийн сайд Лавровтой уулзах аж. Эдгээр уулзалтын явцад хоёр улсын харьцааг сайжруулахаас эхлээд Иран, Сирийн асуудал, удахгүй болох “Их найм”-ын чуулга уулзалт хүртэл маш олон асуудлын талаар хэлэлцэнэ.
АНУ-ын Төрийн департаментын сайт дээр гаргасан мэдээлээс үзвэл Керри нь удахгүй болох гэж байгаа Ялалтын баярын өдөртэй холбоотойгоор Нэр нь үл мэдэгдэх дайчны хөшөөнд цэцэг өргөж, айлчлалаа эхлэх аж. Мөн Эх орны аугаа их дайны ахмад дайчидтай уулзаж магадгүй юм байна. Цаашлаад үдийн цайныхаа дараагаар Ерөнхийлөгч Путинтэй, орой нь Лавровтой уулзана. Харин дараа өдөр нь Оросын иргэний нийгмийн төлөөл гэх хүмүүстэй уулзах аж. Эдгээр нь сөрөг хүчний төлөөлөл байх бололтой. Уулзалтын үеэр хэлэлцэх гол асуудал Сирид болж байгаа иргэний дайн болно гэж шинжээчид үзжээ.