ОХУ-ын нийслэл Москвагийн төв Улаан талбайд Аугаа их Эх орны дайны ялалтын 68 жилийн ойд зориулсан цэргийн парад болж хүн төрөлхтний түүхэнд гарсан хамгийн их гамшиг, аюул дагуулсан дайнд ялсны ойг тохиолдуулан цэргийн сүр хүчээ харууллаа.

Кремлийн цамхгийн том цагийн харангын дуугаар парад командлагч хуурай замын цэргийн командлагч хурандаа генерал Владимир Чиркин ОХУ-ын Батлан хамгаалахын сайд Сергей Шойгуд рапорт өгснөөр баярын парад эхэллээ.
Батлан хамгаалахын сайд парадад оролцож байгаа анги нэгтгэлийн дайчид, академи, их сургуулийн сонсогчидтой мэмндэлсний дараа ОХУ-ын ерөнхийлөгч В.В.Путин илтгэл өгсөн юм.

Аугаа их  ялалтын 68 жилийн ойн баярын мэнд хүргэж, дэлхийн II  дайны ялалтад оросын ард түмний  оруулсан хувь нэмрийн тухай Ерөнхийлөгчийн “ 1945 оны тавдугаар сард болсон их ялалт бол хүн төрөлхтөн дайнгүйгээр аж төрөхийн эхний харанга болсон юм. Эн бол орос орны иргэн хүн бүр гэгээн ирээдүйдээ итгэх итгэлийн гэрэл гэгээ байлаа” гэж тэмдэглэлээ. Үүний дараа их ялалтын ойд зориулсан баярын цэргийн парад Москвагийн  хөгжмийн дунд сургуулийн сурагчдын бөмбөрчдийн  жагсаалаар эхэллээ. Үүний араас ОХУ-ын Зэвсэгт хүчний гурван төрлийн цэргийн хүндэт харуул явж өнгөрсөн юм. Жагсаалын тэргүүнд суворовчууд, нахимовын тэнгисийн цэргийн сургуулийн сонсогчид, араас нь Аксайн казахын кадетын корпусын сонсогчид явж өнгөрлөө.
Ингээд цэргийн академи, дээд сургууль, байлдааны анги нэгтгэлүүдийн жагсаал хөвөрч араас нь Оросын зэвсэгт хүчний сүр хүчийг гайхуулсан 100 гаруй нэгж техник, агаарын цэргийн 68 нэгж онгоц, нисдэг тэрэг Улаан талбай дээгүүр нисч өнгөрсөн юм.

Улаан талбайд болсон цэргийн парадад ОХУ-ын зэвсэгт хүчин, цэргийн нисэх хүчин, тэнгисийн цэргийн флотын нийт 11 мянган цэргийн албан хаагч 101 нэгж техник, 68 онгоц, нисдэг тэрэг оролцож Москвагийн гарнизоны 800 хүний бүрэлдхүүтэй хөгжмийн бүрэлдхүүн ая дан тааруулсан байна.