Израилийн Ерөнхий сайд Бенжамин Нетаняху тавхан цагийн нислэгт зориулж 127 мянган ам.доллараар онгоцонд унтлагын тасалгаа засуулснаас шүүмжлэлийн бай болоод байна. Тэрээр Их Британийн Ерөнхий сайд агсан Маргарет Тэтчерийн оршуулгад оролцохоор Англи руу нисэхдээ л ийм хэмжээний зардал гаргасан аж. Чартерын онгоцонд дөрвөн хана босгож унтлагын тасалгаа бий болгож, бизнес ангиллын 22 суудал нэмж суулгахад ийм зардал гаргасан болохыг Израилийн 10 дугаар суваг телевиз анх нийтэд мэдээлснээс хойш хэвлэлүүдээр шуугиан тарьсан юм. Израилийн эрх баригчид төсвийн зардлаа багасгах хэрэгтэй байна гэж мэдэгдэж, татварын хэмжээг нэмэгдүүлсэн атлаа өөрсдөө ийм үрэлгэн зан гаргаж байгаа нь олны дургүйцлийг төрүүлж байна. Харин Ерөнхий сайдын хэвлэлийн алба тайлбарлахдаа Б.Нетаняху ийм өндөр зардал гарсныг огтхон ч мэдээгүй гэжээ. Гэхдээ Б.Нетаняху тансаглалаасаа болж олны шүүмжлэл хүлээж байгаа нь анхны тохиолдол биш. Энэ оны эхээр гэхэд Ерөнхий сайдын албанд зүтгэдэг туслахууд жилдээ 2700 ам.доллараар зайрмаг худалдан авах төсөвтэй байсан нь илэрсэн юм.