Энэ оны хоёрдугаар сард Оросын Челябинск мужид унаж олныг сандаргасан сүүлт одны хэлтэрхийг Чехийн нийслэл Прага дахь үзэсгэлэнгээс үзэж болох нь. Прагийн Дрновын гудамжин дахь үнэт чулуу, ховор эрдсийн танхимд гарч байгаа эл үзэсгэлэнд Челябинскийн солироос гадна Орост 1947 онд унаж байсан, мөн дэлхийн бусад хэсэгт унаж байсан 1000 орчим солирыг дэлгэн тавьжээ.
Челябинскт унасан солирын хамгийн том нь болох таван см хэмжээтэй хэлтэрхийнээс гадна 19 жижигхэн солирыг Чехийн экспедиц Оросоос аваачжээ.
Хоёрдугаар сарын 15-нд ОХУ-ын Челябинск мужийн Чебаркул нуурт унасан солир дуунаас 44 дахин их хурдтайгаар унасан байна. Солир унах үед 1200 орчим хүн нэрвэгдэж, байшин барилгын цонх хагарч ихээхэн хохирол учруулсан юм.