Жүжигчин Анжелина Жоли НҮБ-ын сайн санааны элчийн хувиар Аюулгүйн зөвлөлийн хуралд оролцож, дайн байлдаантай бүс нутагт амьдарч буй эмэгтэйчүүд хэрхэн хүчирхийллийн золиос болж буйг талаар мэдэгдэл хийж, улс орнуудыг үүний эсрэг шийдвэртэй алхам хийхийг уриаллаа.
А.Жоли хорт хавдраас сэргийлэхийн тулд өнгөрсөн хавар хоёр хөхөө авахуулах мэс засал хийлгэх гэж байхдаа ч дайн тулаантай бүс нутгийн дүрвэгсдийн лагериар явж, хүүхэд эмэгтэйчүүдтэй уулзаж байсан юм. Тэрээр ингэж уулзаж явахдаа зөвхөн эмэгтэйчүүд гэлтгүй эрчүүд ч бэлгийн хүчирхийлэлд өртсөн тухайгаа ярихыг чихээр сонссон гэдгээ хэлээд улс орон бүр өөр өөрийн хэмжээнд хүч тавин тэмцэхээс гадна олон улсын хэмжээнд ч энэ асуудлыг гаргаж тавьж ярих цаг нь болсон гэж үзэж байгаагаа мэдэгджээ. Хэдийгээр сүүлийн хэдэн арван жилд дэлхий дахиныг хамарсан томоохон дайн гараагүй ч бүс нутгийн хэмжээнд гарсан олон арван дайн, зөрчил мөргөлдөөний хөлд олон зуун сая хүн нэрвэгдэж, эх орноосоо дүрвэн, маш хүнд нөхцөлд амьдарч буй. Хүний эрх хамгийн ихээр зөрчигддөг дүрвэгсдийн лагерьт хүчирхийлэл хамгийн том асуудлын нэг гэдгийг А.Жоли тэдгээр хүмүүсийн зовлон бэрхшээлийг газар дээр нь, өөрийн нүдээр олонтаа харж байсны хувьд дэлхий нийтэд сануулж байгаа юм.