“Apple” компани Хятадын хэрэглэгчдэдээ хандан хуурамч цэнэглэгч ашиглахгүй байхыг анхаарууллаа. Iphone утсандаа хуурамч цэнэглэгч холбосноос цахилгаанд цохиулан, одоо комын байдалд ороод буй нэгэн хятад эрэгтэйн тухай мэдээлэл гарсны дараа тус компани дээрх анхааруулгыг гаргасан юм. Энэ сарын 8-нд дээрх эрэгтэй утсаа цэнэглэж байхдаа ярьснаас цахилгаанд цохиулсан бөгөөд өнгөрсөн долоо хоногт бие нь бүр муудаж, одоо комын байдалтай болоод байгаа гэнэ.
Үүнээс өмнөхөн бас нэг хятад бүсгүй iPhone-оо хуурамч цэнэглэгчээр цэнэглэж байхдаа дуудлага аван ярьснаас болж, цахилгаанд цохиулан амь насаа алдсан билээ. Энэ хоёр явдлын дараа Apple компани хэрэглэгчдэдээ, ялангуяа Хятадын худалдан авагчдад хандан мэдэгдэхдээ тус компанийн бүтээгдэхүүн, дагалдах хэрэгслийг ч зөвхөн нэрийн барааны дэлгүүрээс л авч байхыг дахин давтан анхааруулахын зэрэгцээ уучлал хүссэн байна. Түүнчлэн оригиналь цэнэглэгч ямар байх шинж тэмдэгийг ч тайлбарлаж өгчээ.
